Vilian Ispalidav
Isbukun Bunun

Habas daingaz dau hai, aiza mapakadaidaz tu tastu-mapadangi, aizan tu tacini kanaskalun tu uvaznanaz. Pacinganan naicia uvaza tu Biung, aupa kanasia Bunun tu ispacingan, maza cinustangusan tu ubuh nanaz hai asa tu ispacina sia tama-hudas tu ngan.
Biung hai kaupa hanian taldadaing, saicia tastu asang mastan mataliskang cisdadan, mais mapasavai hai uka tu tacini listulun saicia, amin iskaupakaupa minihumis hai uka tu tasa mahtu sisbai sia isaicia tu tanangaus. Makuniv Biung tupa tu: Latuza saikin tu, ukain tu tacini mastanku mataliskang! Aupa saikin hai tastu dalahcin mastan mataliskang tu bunun.
Aiza tu hanian, cisdadan Biung sia mabukzavan, sadu tu mani ana aiza kingangaus saicia. Miliskin Biung tu: Mataliskang saikin, mavia mais samangha sadu idadaza sia dihanin tu lum hai, malngangaus zakuan i? Mililiskin sai-ia at nin mahtu malsasa, samangha at cinmangmang tupa mas idadaza dihanin tu lum tu: Lum, namapasavai kata, samabin kata mastan mataliskang i?
Tauna sainin pasavai tu hanian, miliskin Biung tu: Ai, nasavaianku kasu. Cisha kalinluvluv, tupa Biung tu: Mais pan-utungin luvluv hai, nakitngab kata pasavai! Kitngabin pasavai, tuza tu Biung ngangaus. Isia asang tu uvavaz sadu saicia at tupa tu: Biung, mapikuabin kasu i? Antalam Biung tu: Mapasavai saikin mas lum cisdadan. Ni tu zav, palandu mas takiasang tu madadaingaz, tupa nai-ia tu: Biung, mapikukuabin kasu i? Antalam Biung tu: Mapasavai saikin mas lum cisdadan. Makinpataz madadaingaz tupa tu: Namahtubin kasu mapinvai ma slum i? ka tu mataimang. Haitu tuanak Biung tupa tu: Mahtu saikin masai, aupa zaku mastan mataliskang.
Mututusbut Biung cisdadan, taunasainin sia bukzav, samangha sai-ia sadu tu lum hai itan-ikuang, kamingming mahainan miliskin tu: Mahtubin saikin savaian i? saint u mapasavai hai nautu nazaku savai! Masa kamingming sai-ia mahahainan hai, ai iu! Aiza hangsia itanangaus batu, ni biung mananulu at pantustus, ai madahpa, nalumcia maipalasan tu naispapantustus mazaku, paspasun Biungcia isia malung tu zas tupa tu: ni tu mikua, ni sain mapiskaina inak tu kaibiskavan, aupa zaku mastan mataliskang.
Cisdadan, ni tu hai-iaphai-iap tu taunghuvaliin, samangha Biung sadu mas dihanin “mavia tu maupacin tu, nibin lum itan-iku zakuan i? mavia laupaku tu itanangaus zakuan i?” Masalahit Biung tupa tu: “Lum, kaz saikin namuiav savaian su, nazaku sanganin savai!”
Macingna Biung macimananu cisdadan, haitu mais samangha sai-ia hai, sadu tu sidahdaun sai-ia ma slum, sanavai masisinabp, nau tu ni tu min-ama-ama listulun mas lum. “Mavia saikin tu ni tu mahtu listulun i? Zaku aupa mastan mataliskang hai!” Makuang itu Biung is-ang, at malputaciah nastu paimangmang tangis: “Mavia tu zaku savaian i? Mavai saikin tu ni tu listulun mas lum i? Zaku aupa mastan mataliskang hai!”
Dungzavin sai-ia minhai-iap tu, kata tacinicini bunun hai aizan amin mas paskaupan, kaka tu makas-ang tu mataiklas at istamasazan. Kahusbun hai ni tu sima savai sima savaian, isia tus-acin hai asa tu sianisnis.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容