mupana’ʉ taniarʉ niurina kari
Kanakanavu

miana ’ʉnai mamane mita ia, urucin kani meesua taniarʉ, ’apapuiri urucin taniarʉ arapipining, imo, tantaniara maciasʉ taniara, ’akia mapitʉ’ʉ, muru’inasʉ cau meesua, sii, ka’aan tavarʉ’ʉ tia nukanmana aramia’ʉ? tia nukanmana putukikio? tia nukanmana tarasangai? maraapusu kangvang ’ʉnai mamane, ’akia cau tavarʉ’ʉ te cu makananu nuari?
meesua, ’una tacini nanmarua nanakʉ, nanara kani, miacicin cumacʉvʉrʉ. ’una kani cani taniara, mookusa cakʉran sua nanakʉ iisua, tia rumariu’u vutuukuru, campe tia rumariu’u, niriu’u kee ucani sanapisapi, niara kee tumaini! makaa’ʉna nguain rumariu’u, nakai sua tinaini kee sanapisapi iisua ia, ’acuu maka’ʉna musikarʉ na nguain tamna sapuarʉ, arakuracʉ nanakʉ iisua, sii paraapusu ’inia rumariu’u vutuukuru. pacʉpʉngʉ nanakʉ, ʉʉ’ʉ kacʉ! te maku avicin na tanasa, siarupaca maku matu’apuru, niara kee tumini na nguain tamna siavuku. pui’i cu na tanasa. mataarava rovana, te cu matu’apuru, te kani po’ocipi uru, tikirimin kee sanapisapi iisua, ’akia na nguain tamna siavuku, tikikirimi kee na namuriungu, ’akia! pacʉpʉngʉ nanakʉ, cucuru ninparu! nakai ka’aan kasakʉnʉʉn, makenanu maroka, matasa’ai na tatarʉ, ’acuu sini’icʉpʉ.
aramia’ʉ akini taniara, ʉkʉrʉn nanakʉ nguain tamna vʉcʉkʉ, miseen makai ’una karanana, koo kee ʉsʉ’ʉn na cʉpʉngʉ, tia aramamanʉng nusoni misee. miaranau cu, arasurumu nipiivura nanakʉ iisua, koo miaranau, nikamanuumanu ’a’ai sarunai. cucuru macangcangarʉ nanakʉ iisua, patimanʉngʉn kee ’apacʉvʉrʉ, matanganai ’inia, Naparumaci kisʉʉn.
aratatia sua manu sarunai Naparumaci, ’apaco’e koo pa nimararupang, nakai mintasʉ cu, mataa ’una ’iintasʉ, ’esi cu kipapapa sasarunai aracakanʉ, paira noo cini’ʉra cu kee tapinange ia, rangrang cu manguru, icu’ʉn kee, mupana’ʉ, matapari’i cu. kangvang marʉkurapʉ, makai vutunu, vavuru, takuisi, to’urungu, ’apaco’e ’anuka maa cini’ʉra kee, maatʉa, tavarʉ’ʉ nguain ’apaica nipaicaa marʉkurapʉ, atʉnʉn kee, mupana’a umara. mamʉmʉkʉ nguain tamna kʉkʉnang, ’esi pakʉnnau kee mara sua marʉkurapʉ iisua? ’una cani taniara, ’esi na rʉmʉra aracakanʉ, pasiin kʉkʉnangiin, Naparumaci, mucanamaa pa kasu, makacang Naparumaci pakiituru, ’acecu mucanumu. niara kʉkʉnangiin nguain tamna ’acai, putuvʉrʉke cumacʉ’ʉra, neni ’esi tisikariin? ’una vuru, rupacʉ, vava tutui. takutavarʉ’ʉ Naparumaci, koo arakuracʉ, nakai miaa pui’i tanasa ia, tuturuun kee nguain tamna cina, pasiin cineen, ’akuni aka cʉpʉngʉ, manmaan kangvang kʉkʉnang musu arakukunu kasua, uranoo nguani ’uma’anupu, noo ’uneen iikasu tamna niaracakana ia, sovungo na kincaucaua.
nimararupang cu Naparumaci, tinakacicin kamanʉngʉ rupacʉ tatia, pasiin cineen, tia numani musu tatia rupacʉ isi? mariivari Naparumaci, te maku pana’ʉn ucani taniarʉ, makasi cineen, ’apaica kʉcʉ cʉpʉngʉ musu. aranai meesua, mati’arangʉ cu nguani mariinguna karu mataa ’uringi, kamanʉngʉ pa macasʉ tarisi. mataarava cu taniara, pasiin kee cineen, te cu ku moca! nikiri kee tarisi na tanasa, marisʉ’ʉrʉ mookusa na tatukuseen, aracan cu na tararakaua taniarʉ, moon ’inia mariitarʉ, meesua kani ia, ’una tacini sarunai nikipapa Naparumaci, pasiin kee rʉ’ʉvin, noo mupana’ʉ ku taniarʉ ia, te kita makacang musutavʉrʉ. ararakau cu sua taniarʉ, urunge nguani tamna takusini cumai, ’uruupaca cu nguain tamna rupacacʉ, nupana’ʉ na taniarʉ, musucʉkʉʉcʉkʉ na taniarʉ vuru, musutavʉrʉ cu nguani na canumu, koo pakisapatʉ sua rʉ’ʉvin, nipunai taniarʉ tamna cara’ʉ, macici curu, macai ’inia. niarasurumu arapitʉ’ʉ ’ʉnai mamane, matisapʉʉsapʉ Naparumaci mukʉrʉ tarisi pui’i na tanasa. mama’ari sii, masiiraru nimati’arangʉ cu cineen mariinguna karu mataa ’uringi, matu’apuru cuneen, tavarʉ’ʉ cu Naparumaci, ’apaica sinangʉ iisua, makacʉkʉna tanasa.
miaa koo pa pana’ʉn taniarʉ ia, urucin taniarʉ meesua, muru’inasʉ cau sii, maciasʉ kangvang mamane. masini nipana’a ucani taniarʉ, ma’icʉpʉ ucani taniarʉ arapipining, ’akia cu ciasʉ, mapitʉ’ʉ kangvang, miaranau makaasua. miaa campe ia, mama’ari pa sii, ’una pa karu, to’umangʉ, ranʉngʉ, cʉnʉ, tavarʉ’ʉn pa rumarʉn, mara sinangʉ, miaranau taniara, ’akia cu cucumeni tavarʉ’ʉn rumarʉn, kangvang ’ucu tanasa, ’aruvu, rumarʉn cu kangvang. matacuvucuvungu cau mataa marʉkurapʉ kaisisi, tia ’aparapining taniarʉ, ka’aan pakiituru taniarʉ arapipining, marivivini, ’apucanʉn cau tarukuka, maakari taniarʉ, tuturuun tarukuka taniarʉ, ka’aan cu cau tia miakaka ’inia, potucucuru kariin taniarʉ, totasiarʉ noo umoni tarukuka ia, arapipining cu taniarʉ. koo mamacai sua nipana’a taniarʉ, nakai nimiaranau musucara’ʉ, ka’aan cu mintasʉ nguain tamna sinangʉ, masini sua cʉ’ʉraa mita vuanʉ ia, nguai sua nipana’a miana taniarʉ.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容