kowaw a ta:in
Saisiyat

SaySiyat hayza ’aehae’ kapanpanabih komSa ma’iyaeh ha:kowaw, hini kapanpanabih tabin isahini haysiya ’okay ngoipi.
ray kakhayza’an a tomal, hayza ’aehae’ karkarang ma’iyaeh Sin ta:inin, haysiya ’ima ’ol’olae’an, rengreng taniSowaw hi yaba’ rima’ ’os’oso’an komita’ Sipatawaw ni yaba’, rengreng kama taniSowaw ila siya ma’ kayzaeh ’okik tikot, monhal siya nonak rima’ ’os’oso’an ray ra:an Sahoro: ’aehae’ maylaS, yarinakep tikot maylaS koma:as, ma’az’azem ray kara’, ’am nak’ino’ kayzaeh romakep ka maylaS.
siya mahoro: ila,lobih taew’an papaskayzaeh hi yaba’ ka boehoe: ’iniman, ’isa: lobih ila. ta:in komSa : “yaba’ paskayzaeh ka boehoe: ’iniman.”
yaba’ komSa : “yako ’am matawaw, Sa’ila papaskayzaeh hi ’oya’.”
rima’ kan ’oya’, ’oya’ ray katalekan mam tomalek ka pazay.
ta:in komSa : “’oya’ paskayzaeh ka boehoe: ’iniman.”
’oya’ komSa : “’oya’ minkoringan o ’ampowa’ ra:am paskayzaeh ka boehoe:, Sa’ila payaka:i’ hi yaba’.”
aba’ ki ’ oya’ ’isa: nakhini kakonibih, ta:in ’imahoiS ka hin’az’azem rima’ ila nahan komita’ ka maylaS.
“hawka’ ila! hayno’ ila maylaS!”
siya komi:im ila ka hiza maylaS, ‘oka’ nanaw i tihoro:i, ’oka’ ka maylaS siya lobih ila.
lobih taew’an siya ’okay payaka:i’ hi yaba’ ki ’oya’, rima’ ila ray saksaka: siya nonak, saze:z ka ’a’aez noka hilaSan ray binlengan pinaksilaeh, ta:in mari’ ka ’a’aez Sipakpaksilaeh kan nonak ray basang, sizaeh ila manpaehpaeh ka hima’, pakoSa nonak ra:am ila homayap, ’isa: rima’ ray taew’an latar ’ima sopaloy ka ra:a’.
ta:in komSa : “’isahini hayza ila ka ‘a’aez, yako ’am ta’itol ila ray kaehoy babaw!”
ta:in matol ila : “yaba’! ’oya’! ’ampowa’ moyo takayni’ paskayzaeh ka boehoe: ’iniman, maylaS ’oka’ ila, yako ma’ ’am rima’ ila! ’am sisizaeh ila!”
yaba’ ki ’oya’ tanipinatol Sakosiza, kita’en nasiya korkoring ray kaehoy babaw ’ima manpaehpaeh ka hima’.
’oya’ homangih komSa : “lobih So’o! yami tapaskayzaeh naehan ka boehoe: ’iniSo’.”
ta:in komSa : “paybae:oeh ila! ’ana moyo homangih ’am paklobih ’iyakin ma’ kayni’ ila ya:o! yaba’ pil’awan! ’oya’ pil’awan!”
matol matol homayap rima’ ila ray kawaS babaw…..bi:il ila, ta:in sa’iwaz makowaw rima’ ila.
hini ’isa: noka SaySiyat karkarang ’aring kakhayza’an kapanpanabih, hini kapanpanabih komSa So: kowaw ray kawaS babaw homayap o tomokokowaw, ’isa: komoSa ’am kayzaeh ila ka kawaS.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容