t’anak pinlwan na ’Tayal
Squilq Atayal

maki qutux pinqzyon na ‘Tayal, mha sqani ma.
sraral raral mga,blaq balay qnxan na Tayal , ana ini ptzwaw ga, maki kwara nniqun ru qqyanux nha ma, si ryax mqwas mzyugi hmyapas krryax kwara nha .
phapuy mami mga,qutux bwax skan nha puyun qu smka bwax qasa lga, su’un qutux kyawan mami, tnaq niqun kwara qutux ngasal lma.
aki maniq hi mga,si huwaw mha: “bzyok!bzyok…”lga,“ngoq!ngoq!”zinga balay nyux mqzinah mwah s’urux beh squliq qu bzyok, nanu hoqun sazing ini cyugal bukil nya syun sa hanray ,’mukan yawa qu bukil, ini kbsiq lga, m’hi qu bukil qasa, thkun niqun ga, blaq balay niqun ru tnaq nha niqun qutux ngasal qu hi qasa lma.
nanu yasa, plawa nha ana bqanux mit para qbux yapit…, mwah kinthi phoq bukil ru m’hi na qbsinuw qasa qu bukil nya lma.nanu muhak bukil qsinuw qu tayal uzi ga, ini ksyaw sazing cyugal hoqun nha nanak.
Phapuy qu kkneril mga, plawa uzi qu qsya, mwah ms’un skzyon tkran qsya qu qsya. qhuniq sangi puniq uzi mga, mung hngyang mlawa squliq lmga, “bel…”si uwah pinblaq mebkuw sa tnobuy sngyan puniq qu qhuniq, nanu ini nagi musa tmqsya ru tmqhuniq qu tayal hya la.
aki maniq cikay sbing ‘laqi mga, plawa nha qu hzing mha“hzing!hzing hzing…”qu hhzing lga, si ktay “tus!tus!tus!...”nyux s’unan sokan ru sbing balay na boq hzing qu pyatu sa haray, nanu ana guqoh yutak warang qwirux ziluk…plawa lga maki kwara la.
son nasa, maki qtux qu mqelang na kneril, si agal cingay bwax ppuyun nya, teta ta ini si ryax phapuy mqu inlungan nya, si ktay, “pak!pak!..”hngyang balay qu kyawan nya ru ktan lga,“pet!pet!…”ini baqi pira qu pzit mlaka kahul kyawan mwah si su’un ngsal nya,“qlangan na squliq ,babaw nya lga, mosa siki myabux simu mqumah mtzywaw ga,pkaki niqun mamu, pinbaq wahun myan hmiriq maniq pagay mamu uzi ,hahaha…”bilun kamal ru msyiq na pzit lru wayal mlaka qu ppzit qasa la.
ru maki uzi qu ms’aris na squliq ,wal nya si heti qutux muzi na bzyok qnhyun mru, wal si “yok!yok!”mngayoq mgey qu bzyok qasa lma, son nya kmal kwara qbsinuw lhlahuy rgyax lmru, tluhing kwara qbsinuw mha “ta kinyaqih lungan squliq hya la, nway babaw nya aki maniq hi qbsinuw lga, usa mlata rgyax tmiriq nanak la”.
maki qu squliq blaq nya tmhazi ana ima, ktan nya nyux kahul rgyax qu qhuniq lmga, stlqing nya lahuy miquy syaw tuqi ru “waw!”hwagan nya qu qhuniq lmru,“aya mu! aya mu!”mnkux kwara qu qqhuniq qasa lmru, wal si kinkongat mgegay mgey kwara qqhuniq, ini balay uwah ana si say nanu mlawa squliq babaw nya lma.
aring kasa lmga, moyay mtzwaw krryax qu squliq,m’uy balay mtzwaw na qqyanux nha lma,qani qu pinqzyon na ‘Tayal raral.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容