Rmdax dwiyaq ka tasil btunux bhawway
Tgdaya Seediq

Niqan kingal jiyax rmngaw ka tama mu, “dsun maku rmiwaw alang uqeyyan heydaw, qmita ta saw sklwiyun kingal dwiyaq, ” mbahang ka swayi mu qrijil do mqaras ba mi rmngaw, “ Mtawa ku ka kingal jiyax ni.”
Mndakil ku malu ba nniqan alang ka yaku, dwiyaq kana ka mtqiri alang mu, niqan kingal mtasaw yayung mtqeyri alang nami, alaw ka saw ini qruciq ka yayung, kiya ka qtaan kana ka qsurux yayung wawa rmiwaw ruma qsiya.
Lala ba dwiyaq ka hraan heydaw nniqan nami, hngak alang o burah balay knux niya, elu o ngac knux ayang, manu kiya ka burah ba sknxan ka hngak alang nami. Qulung dhuq ka tnawa mu kingal jiyax saya, saya ka mawsa nami uqeyan heydaw qmita kingal saw sklwiyun dwiyaq, mklelu nami smlahaw lala ba niqan bilaq mi niqan beyhing dwiyaq ka qtaan nami.
Ini bsiyaq dhuq nami dawras dwiyaq Truku, beyhing balay ka dwiyaq wa mheyyu brah mu, knttu mquri daya ka dawruy nami, isil elu niya niqan beyhing usilung dungal, ana manu ka sdmhawan nami kana ka dwiyaq, usilung, yayung, mtna ba saw rnisuh patas ka knmalu qtaan.
Dhuq nami beyahing alang, lala sejiq, lala sapah, lala dawruy, ini balay pntna ka alang dungal, lmutuc nami mquri alang Nantow, klelu mawyas “ lala dwiyaq ka alang mu, lala qhawni uri,” ka swayi mu qrijil, sayda tna nami dhuq alang Jngay syang.
Smsung sayda dhuq nami Jngay syang da, asi lux pskluyi yaku ka swayi mu qrijil, mjiras mlawa! “ qtayi! dwiyaq wawa kingan nanak, rmdax balay, haray mpajiq ka rakaw niya, mtna rnngaw kari tama mu kingal saw sklwiyun dwiyaq.” lmutuc rmngaw ka tama mu, “pneyyah heyni ka rudan ta sawxal. ”
Sayda smnru rmngaw endaan rudan sawxal ka tama, “ sawxal o niqan kingal sejiq Tusang ka hangan niya, heyya nanak ka musa maduk dwiyaq, mkksa dwiyaq, wada theyyaq ba ka ksaan niya do ini kla miyah sapah da, kiya ka mrdang dwiyaq ka Tusang, lmnglung ka heyya yata hawya msa miing ka sapah da haw? Ini bsiyaq mkla ka lnglungan niya, wawa mniq quri tasil btunux bhawway heyya ka alang mu, hlayun ka tasil btunux bhawway do, kiya hlayun ka alang mu uri da. ”
Tduwa dmudul tmsa elu yami ka dwiyaq tasil btunux bhawway, dmudul yami musa dhuq sapah, aji nami niya krdang ska dwiyaq ka heyya, asi ka hmjiyal tasil btunux bhawway, kiya ka klaun ka nniqan alang, ini muriqu wiman ka tasil btunux bhawway, alaw saw tasil btunux bhawway, wawa mniq baraw balay dawras dwiyaq, psmiyah balay tasil btunux bhawway dmudul heyya musa sapah ka Tusang, knttu miing tasil btunux bhawway ka heyya, asi lux peyyah theyyaq qmita kingal wa rmdax dwiyaq ka tasil btunux bhawway.
Mqaras ba rmngaw ka Tusang, “ Mdudul elu mu ka tasil btunux bhawway, ana knuwan mdudul yami Sejiq ka tasil btunux bhawway ni, aji nami niya kkrdang ruma dwiyaq, Rmdax dwiyaq ka tasil btunux bhawway, ida wa qmlahang ita Sejiq.”

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容