mamaini kapitanʉ hlahlusa
Hla’alua
ʉnʉmʉcaihli rumahlaʉ, tamuucu ku pisipamia umahli kua vuvulunga hla vuhli’i, kani’iia hlitalʉmʉlʉmaku tumapaʉ makani’i siangusipikuna: aluaihlakua hlitapaʉ pakita hlamama pakisuahlai hla ka na ’ana uruahlʉai ulavaisa arataʉ pakisuaili ihlaku ngasa uruahlʉa sarapunguna rʉrʉmanʉisa sangalʉa hlitapaiku: amihla hlamama kukia atapaʉ kupihlitapusahlana,mava cangʉkia musuturu tuma’aumusikunga,siriacani hlasasa ruana, pihlitapusahlana kuhlaisai kucuaku paratumatapa ʉ musala musuturu muasalia miapihlihli maracucumia pihlihlina.
mamualualu ʉnʉmʉcaihli maruaku sahalasamo marahli ahli marakakacuka saliamiapihlihli takacicihlia ihlaku matingahlangahla. ruvana mutaruakulalavukua kuatʉatʉhlʉngaʉ siausuai sa aari maivʉvʉrʉnga marukacucu'u makuvau patakʉm ʉ’aʉ ihlaku maruka mamaini amihlaihlaku taliliviua ku tumapaʉ ucani’ukui.
kunaku hlitumapaʉ’ukui, tumapaicuaku ucani tapaʉ, ula vaisa amihla kana’ana:tʉkʉhlʉ malivutuaku pimʉlʉngʉs ʉngunguru taisacivuka hlavuhli’i tumuaku ucani ’ukui. tumapapiahlicuaku tumapaʉ,kuasasangarʉa kana’ana. matiangahlangahlaku saliamiapihlihli,kuhlaisai tumaca pacapangicuaku tanguapanʉ uvuraisana, amiakuisana marʉrʉmanʉa’ukui,talʉmʉlʉmʉhlau masasangaricua kana’na. kani’i mamainina tampakaritʉkʉhlʉcucu’u,araarahlua pingahlacuakuisana mamaini kapitanʉ hlahlusa.
rahluua inicikiaku macahlia, mamaini kapitanʉ hlahlusa hliangahli masaihla sasaruana’acangʉrahlʉ mʉcʉkʉhlʉ, kana’a ’acangʉrahlʉ matataisa mainisana. hlamacuaku aunani kihlahlamu hlamamanaia, uka’acucu ’u tararianʉkariku.kuhlaisai patakuarianicuaku kihlamu hlamu cucu usumanʉ, mamaini kapitanʉnaia hliangahli 612maini’acangʉrahlʉ, kani’i maini’acangʉrahlʉna ma1909caihli pataratʉahlʉ. hlahlahlamamana tuahlʉsangalʉ angahli siaiapʉcaihli sasaruanana aracahlia pahlumiamiaisa.
tammaiatuhluhlua mamaini kapitanʉna masitakuamiaisa sʉsʉngʉhlakiu’una.hlimungahlʉ usumanʉ sasaruana’a cangʉrahlʉ marukacucumasavaʉ asapu maipuhlipuhli tutusuli kiu’u marauruahlʉaka ulavaisa: tumalʉlʉvʉakuisa tumapaʉ’ukui,tuahlʉ kukucu suli kiu’u, tam masasangarʉ akana’ana,hla takuliacʉatʉkʉ isa, umau’ainia ’ukuina tavahlihlana. pakisuahlai ihlaku,tuahlʉ’ainia tasʉmʉ tavahlihlana maiatuhluhlu kuapau’ukuina,uka’apasamiakuka matia ngahlangahla saliamiapihlihli, amiakuisana: tasʉmʉta vahlihlana kupihlitapusahla, pita’iaraku,kukia alakuava cangʉ ta’iara api'arahlasʉ ihlaku.
takuliacʉatʉkʉisamii: macimaruacucu’u mahlimiaili ’acangʉrahlana, marumuku canicani tavahlihlana, kamici cua kana’ana kumita ’acangʉrahlʉnaia uka'ata isana mavacangʉ. hla macimusa’ukuina umutavahlihla naia, ausicu mususʉpicumʉmʉa ’acangʉrahlʉna, mauui ku takualangʉlangʉa kani’ina: takuliacʉa tikiku musamahlukua mamaini kapitanʉna tu mahlivacavacangʉisana, tumalʉlʉvʉisana tumapaʉ cavu ngusu’ukuisa.
sasaruana ’acangʉrahlʉ mamaini kapitanʉna, maruisana ka ucanitavahlihla. aariaaria kana’ana tumalʉlʉvʉ sasa ruana’acangʉrahlʉna maivʉtʉraʉ,rumavi tutusulikiu’u, maipuhlipuhli caalʉ uruapuhlua. tam mainia caalʉ uruapuhluaisa, acahli’umatihli’asarʉ. miungucu ruvana acahlisa umarucavu ’ahlinguna maicavu maiatuhluhlu tavahlihlana.
micikiri sasaruana’acangʉrahlʉnaia, tumalʉlʉvʉa kana ’ana pukuatavahlihlana sahlumu, cavua cavu’ahlinguna, amihlaisana: mavahlaʉva arupakakitamana. amihlaisana tavahlihlana: arupakakitamana. papatʉkaca vuna, kucuaku arumuku marumiaisana.macuaku pautu hlangi tapu’ai, pasakamusu apivararʉ tihla’ahlʉ tacinga una.kuaku mʉmʉa uruahlʉ kuli’i. marua’ahlukuku. tumuakana’ana apiacikiri mamaini kapitanʉ hlahlusana, mairahlu malivutu kumita sapiisa mululʉlʉ.
pautuamacuaku mamaini kapitanʉnaia umarua ucani ta rʉana ahlamʉ arauhlusuna tapipuhlu. matumuhlua iacali vaisa sasaruana ’acangʉrahlʉ tarutʉahlʉ tarʉtatʉatʉkʉ hlʉ tuaʉcucu’u.
siaucani sasaruana’acangʉrahlʉ maruaruisana kapitanʉ tahlana. miungucuisana mamaini kapitanʉna rumahlaʉ, umuhlunua kapitanʉna hlimulavaʉsasaruana kutarakaku aisana mamaini kapitanʉna, miacikirinana,umuhlunucu a kapitanʉna apicikirisana.
siausua sasaruana’acangʉrahlʉ maruaruisanaka cacihli pausakisakiri hla apuavavahlicucu’u.apumia kana’ana mamaini kapitanʉna umaru vaciki ramucu pititupu ahla nʉ ramucu. pakiturua mamaini kapitanʉ rumahlaʉ, amihlakana’ana: ’ʉ’ʉraisa vahliungu ramucu, tamucuu puavahli ihlaku.
siautulu sasaruana ’acangʉrahlʉ maruaruisanaka cacihli hlamapaci,ucaniaari mimama. hliparapihlaisa mimaia. hla asapu marinuisa, ta’iaraisaka marinuka ucani aari mimaama.
siaupatʉ sasaruana’acangʉrahlʉ maruaruisanaka cacihli cucumi’a’a. ucaniaaria kana’ana umaricacani hla umiai iapʉ. kuiasau umiapʉ malangica ’acangʉrahlʉna,amihla kana’ana kana’a ’acangʉrahlʉna rianʉami isikanaisa.
siaulima sasaruana’acangʉrahlʉ maruaruisanaka cacihli cucupatuakikima.aariaari ruvaruvaruvana kana’ana patu kima kimasala’a, paiaʉsʉpʉisa maivʉvʉrʉnga, sasarua na ’acangʉrahlʉna, makulai takʉsʉlʉ, kuhlaisai ucani arisanana ucani utuatapusana takuamiaisa kuiangʉtʉ hlʉa cucu’u patukima maʉsʉpʉ.
siaʉnʉmʉ sasaruana’acangʉrahlʉ maruaruisana cacihli takuasasaruanana.suhlatʉisa matumuhlua hlisuhlata nga hla sasaruana, alʉhlʉvʉ vuvulunga hla ngahlasakʉrahlʉ amihlakana’ana: takuasasaruana kuasuhlatʉ mua’aliva tʉ ta’iara, ucanii asuhlata kupalavalʉ vuvulunga hla tʉ nʉmʉna.tumimahla mamaini kapitanʉna karisa, tavahli hlaia kia’alivatʉkipuhlu, tampatakuliacʉtʉkʉ.
miungua mamaini kapitanʉna siaupitu sasaruana ’acang ʉrahlʉ. kana’aia taiisa sasaruana, makana’a marua ruisa naka hlimiungu laihlaka kapitanʉtahlana, upituhlimiaili ka takuasasatuana, masiahlʉ hlimiunguka cucu mi ’a’a, upituhlimiunguka hlamapaci,matuluhlu hlimiaili hlimi ailika cucuapuavavahli, matarungahlʉ mapuahlʉ hlimi aili hlimiailika cucuhlamama. macucu’u mualualu patʉahlʉ hluvu’uia, sasaruanana tu mua maupatʉhlʉ ʉnʉmʉ hlimiungu kima’a cucu’u inici ki tuahlʉ ruvaruvaruvana patukima.
hlamuna mamaini kapitanʉna mahlukua sasaruanana ru mahlaʉ, marunlalavukua tarutʉahlʉ ucanivuhli’i kana’a vuhli’ina amihlaisana: macimaru ucaniaari macumalʉng ʉngʉ sasaruana ’acangʉrahlauia, macahliku tumalʉlʉvʉ ihlau.
micalivia kana’ana rianʉlalavukua, inicikicu miungu sasaruana picucu’u. taratʉahlʉa mamaini kapitanʉna ucani tatavahlihla, ara kicacʉ kualuliri. nanamaru ulimahlimiaili tavahlihla, rianʉmʉmʉa mahlumaraiahlʉ. atʉhlʉngʉa mamaini kapitanʉna: tʉrakukai ucani ihla kua pitavahlihla ukausumanʉ, kuatʉatʉhlʉngʉ kaupau pangʉiauka kana’a, ucani ihlakua pitavahlihla,hla utulu a caalʉuruapuhlua, hla kani’iia kuakuiau parahliulava lava kapitanʉhlahlusa. atʉatʉhlʉngʉ, marucua kana’ana sʉsʉsʉngʉa mupalakʉ tumangiicu.
kani’i murumitacuka takuhlu amihla mamaini kapitanʉna : muara pulaiviuaku pasaula ula’ʉ, takuliacʉa tikikukani’i. amihlatakuhlu: kuakutuahlʉ nua ihlau pasaulaulaʉ, kuna ku ualʉvʉtaraianʉ,macuakumiia, kaupaupangiu mamai ni, macumii, ihlakuia kaupaupangʉaku mʉmʉa takuhlu macumʉlʉvʉ tararianʉ ihlaku, tuahlʉcita arupatumua. macuakumi, maracanicanicuu uka’a usumaanʉ, macu mi, maracanicanicuaku mʉmʉa uka’a usumanʉ.
amihla mamaini kapitanʉna: kuiatʉhlʉnga pasamiaku , hlatumuaku muasala pautuhlangi tumahlaʉ tukucu. amihlatakuhlu:cucu’ukani’i uka’acua pasamiaisamusala aracahlia ta’iarausumanʉ. muasacua hlakana’ana pu’a hlipialangacacalaisana. masasaruanana uka’a mi’a’a’a tukucuna, kuhlaisai kucupitakucua cucu’u. mamaini kapitanʉna aariaari pakiturupasamiaisa musala kumita takuhluna, aunanacu, mʉlʉvʉ tararianʉ takuhlu.
miungucuka maruahlʉ, takuhluna apahlukuamanaisana tatavacihlia apungahlʉpakita tavahlihla. tarangahlangahla mamaini kapitanuna tavahlihla ruma hlaʉ, maratʉkʉhlicu tʉkʉtʉkʉaisa. amihlaisana: kumuausi tavahlihlaku, uka’acucu’u hlita rarianʉihlamu, uka’acucu’u marapihli ihlamu. manikia ucania tavahliaku, mataingalʉ ihlamulangʉlangʉ. pukakukukusahlumu, vʉrʉka sipaicacavu talangahlʉ, taku kuli’ia tihla’ahlʉisa, mauhlauhlangʉ tumimahlaisa na maluliri, kana’anaia tavahlihlaku.
maruahlʉa mamaini kapitanʉna nua takuhluna, amihla isana takuhluna: arupakakitamana, macua macuisa lang ʉlangʉ pahlivinga, kuakiti umaruvulaihli, ucania marua tʉkʉkamacahlia. ta’iaraisaka cuuikua tavahlihlanatikiu, kuhlaisai maralangʉlangicua kana’ana.
akukutumalʉpʉngʉ tumimahla hlicalivaisa mamaini ka pitanʉnaia, ihlaisa hliparahliaku siaualuisa aari, kana’a malavalavauaku makucu acanicu tusuanasahlumu. mamaini kapitanʉ hla ihlaku kiʉlʉsʉ umialalavukua, muasalamu ukikirimi ucani hlitulakua. muasasasala, arasʉsʉsʉmacua langica, murumitacua ’acangʉrahlʉ.
talalʉngʉsʉa mamaini kapitanʉna langica, rumahlaʉ amihlan ihlaku: ’acangʉrahlanaia tam mavacangʉ, ta’iaraisaka langica maru ucani tavahlihla kuakitiita. malitʉnʉlʉakana’ana kumita hlisahlikua sihlangʉ lavu kuna, mii: lavukunaia tam mavacangʉ, ta’iaraisaka auca ucanipatʉkʉaratingi, pihlilʉvʉnga ucanilakua. muhlaluhlalusuamu musala, arasihlangicu rumahlaʉ maitʉahlicuamu lakua sahlumu.
ruvanaisakana’aia, hliunguanaisa mamaini kapitanʉna ucanicaihla sasaruanana. maialangʉa kana’ana marumia pakaritʉkʉhlʉ pasamia musapuaili,kumitaku kana’ana nua vuhlimahlisarʉ maluliliri. miaungucua vʉrʉnganʉ, macahliaku muasalacua mamai ni kapitanʉna
micalivicu ʉnʉmʉcaihli, kucuaku hlipungahlangahla mamaini kapitanʉ hlahlusana. atʉhlʉngʉakuisana aunania hlipilavalavaʉisa ihlaku: vʉrʉnganʉ, macutarakakua langicaia, ta’iaraisaka maruaku tumahlaʉ aisa’acangʉrahlʉna, ta’iaraisaka maku kana’ana ’acangʉrahlʉna macacaca, aunana umahlikua ihlau maluliri, ausia’acangʉrahlʉna macaca camʉmʉa, macua arumukau’acangʉrahlʉ, ihlaisacua ’acangʉrahlʉna macacaca.
tarangahlangahla tukucukunaihlaku, rianʉamiihlaku tua hlʉpuailiia mavacangicu, manikiia takuliacʉatikiku. hlitumalʉlʉvʉaku mamaini kapitanʉna tumapaʉ cavu ngusu, hla kucuaku atʉhlʉngʉ tumalʉlʉvʉisana tumapaʉ ’arisapʉta. auninia kana’ana tumalʉlʉvʉ cumavu ngusu ’ukuina. karʉkʉhlʉaku patuarʉmʉrʉmʉ, kana’a’ukuina umau’ai ni tavahlihlana. apahlapaku atʉhlʉngʉ, mamaini kapitanʉna ruvaruva ruvana umarucavu talangahlʉna maiatuhluhlu tavahli hlana, mʉmʉa ’ukuina paivacavacangʉ .isamanai auna na atʉhlʉngʉ. patasuuru acangʉrahlʉ umahliakuacu ihlau macacaca. marumaruakumaciatʉhlʉngʉ, talʉmʉlʉmʉa kana’ana pamangamangacu, asapucu ʉvʉrʉkaʉ cavutalangahlʉ, marakakacu’ai. atʉhlʉngʉkani’i, maicuui ’acangʉrahlʉ malangicana maralʉ’icuu mʉmʉa.
ausi ihlamukani’i maraiahlʉ marumuku mamaini kapita nʉna, masaihla sasaruana ’acangʉrahlʉna,maru ucani ’ukui kuamupautuahlangisana, sanuacu’aia tavahlihla na, ahlauka’a, sasaruanana aunanacu malavalʉ kupa raiahlʉ. talalʉngʉsa mʉmʉa kumitalangicana, patʉrʉmʉrʉmʉ aunini’aiau’ukui umu’aini tavahlihla, kani’ipasamia pautuahlangicumu, malavalicumʉmʉa kucuparaiahlʉ.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容