Sasbinaz ikit
Isbukun Bunun
Masa punnumang a saikin hai masmuavik mais tupa tu libustan mas ivut daingaztan tu aizas makitvaivi tu is’ang, maaz a aindii a kai’unianku a patasan-paitidanumanan hai kaitangusanku ka’uni siaan inak tu tastu’ininhumisantin. Ung at,ispasaduku a kai’uniankuan mas madadaingaz tu adu mapisingam hai ka masan tu’upa a naia tu na maaz bis tamungtan a kapisingun i ? ung at, ka patuhnaanku mapatas ka’uni a makangadahan tu. Tupaunik mas madadaingaz tu kakaa tu ka’a’unis na mapinsanamaaz mas masuu tu patasan-paitidanumantan at kadaaz a malmananu mapasnanavas malisAmulika、issisipul、pailis’dalahan tu hansiap tu isnanavatan i na ikma’iu’unang. Pahasia masa aipintin hai niinik min’unis malkapatasan-paitidanuman. kaazinik ka kaudii mapasnavas ma’u’uting mas kusbabai at aupa ka min’unininik mas ma’a’uting mas kusbabai.
Tupaunik mas madadaingaz tu kakaa tu ka’a’unis na mapinsanamaaz mas masuu tu patasan-paitidanumantan at kadaaz a malmananu mapasnanavas malisAmulika、issisipul、pailis’dalahan tu hansiap tu isnanavatan i na ikma’iu’unang. Pahasia masa aipintin hai niinik min’unis malkapatasan-paitidanuman. kaazinik ka kaudii mapasnavas ma’u’uting mas kusbabai at aupa ka min’unininik mas ma’a’uting mas kusbabai.
Aupa ka nau tu ka niiangik maipatas ka’unis siditan maisihabas at tuza tu mapatasik ka’unis inak tu tasasang tu kai’unian hai ka antalamunik tu “ nii tu mintuza. na asa tu sius siditia, niik mazima mas ivut-daingaz tu dangian a tian mas daulu-ngutus. Isnavai bis saikin mupin mapapatas ka’a’ uni mas patasan-paitidanuman hai nau tu nii a saia sa'aupatin. Aupa na asinik mahasmav kahna mas kubabai at katmangunku dau mapatas ka’uni mas bau at isaivku at tupaunku hang a sia tu saduav i ingadahtia a sidi, hai ka manaskal haang a saia. Maaz a azandii a uvaazan hai makitvaivi tu uvaaz at patingaananku masa aipintin tu sasbinaz ikit.
Masa aipintin hai inghaiapuninku tu maikusnadahvisan hang a siaan sia kaumasikit tu dalah-malisbintuhan minsuma. a tupa tu maaz a adii a dalah-malisbintuhan a dau hai na ka mastan tu kauman mas isaitia tu lutbutia a kaidaingan. Ung hai tu, mais tahuanku a duma madadaingaz a bunun hai ukas bunun tu latuza. Pahasia mais tahuik mas duma tu bunun hai tupaunku tu maaz a sias sasbinaz ikitan hai maikusnasiaan sia kunian tu B612 tu kaumasikt tu dalah-malisbintuhan. a maaz a aindii a kaumasikit a dalah- malisbintuhanan hai iduan mas bunun siaan 1909 tu painsanan. Maaz a madadaingaz a bununan hai midaazis paisisiaan sia issisipultia sadu mas pailisdalahantan tu hansiap.
Maaz a sasbinaz ikitan hai mananulu mais malka’uni mas ismut tu isiaan sia isaitia tu dalah-malisbintuhantia. inaiza dau tu minus’an hai aiza dau siaan duma tu dalah-malisbintuhan a makasa a bunun a sipungul dau mapisaningsing mavail mas minupapaspas sia lukis daingaz tu iktuus hai ka minkapanuunin masa aipintin. Manaskal dau a saia i maaz a sinindamgazku mapatas ka’uni a sidi a dau hai tupa tu na mahtu dau maun mas itulukis dainaztia tu iktuus. Hai tu, malaspu dau a saia mas isaitia tu lipuah-katliungantia i binis ka kaununis siditia. Tupaunik mas masaitia tu adu na nii a lipuah-katliunganan kaunus siditia i kadulidului at adu na mahtu ma’angkut mas lipuah-katliungantia. aupa ka talpatazunik kakahna mas kusbabai at tusuunku a saia tupa tu sinpakamaaz bis itulipuah-katliungantia a duli a i ! kakaa tu isaintan matahusing i talpatazunik.
Makuang dau a isaitia a is’ang at kananu dau tupa tu “ tanama kata mais aiza tu tatini a bunun a masmuav tu mazima daingaz mas tasa tu makitatini tu lipuah-katliungan tu isiaan sia masmaz tu bintuhantan at. Saia mais ka kaupaang mas bintuhantia saduan mas masaitia hai mangmangin a isaitia a is’ang tu ka malisnaskalnaskalin. Ung hai tu, mais ka duduan tu una’un mas siditia a avadii a lipuah a maun hai maaz a iskakaupa a baintuhanan hai maszang mas ka isdumdum amin.ung at, na tuza bis kasuun tu na ka sivalavala i ? Tuza tu tinkuang amin a inak a is’ang at sikaputunku a sasbinaz-ikittan si’ail at ispatasku ka’uni a isaitia a sidi a mas tutubuk-ngulus.
A maaz a itusasbinaz-ikittia a dalah-malisbintuhan a hai katdaan dau tu tatini mas lipuah-katliungan at dahdahanin dau a saia ma’a’asik mas dalah-malisbintuhantia at ma’a’umas itulukis daingaztia tu iktuus at mapisasaniningsing mas ludun- mutahhaidangtia. Kaumasikit dau a isaitia a ludun-mutahhaidang at tupa tu na mahtu dau iskal’ing mas lulubunun. Mais taunasainin dau sia sanavan hai kunian sia dau mas tutubuk-tidanumantia matubuk a lipuah-katliungan a.
Masa na siskuav dau a saia siaan dalah-malisbintuhantia hai ikakivun sia dau a lipuah-katliungan a masul mas danum at tubukan sia dau mas tutubuk-tidanuman at tauhumisan sia dau tu “minhumisang. “ Antalam dau a lipuah a tupas masaitia tu “minhumisang! Ung at,sizaavang a istutubukan mapisisilatia i niiinik asa makusaitan. Ung i Mais na asik mapasahal mas balikuantan hai na asik tu sisasaa mas ivutazis mukakapa siaan inak tu lutbutin. Niik amin mapising mas takismuutan tu mininhumis i iskuskusanik. ” Avunus sia a sasbinaz-ikit a tu mabiskava kai mudann i nii a saia asa saduan mais mubahbah.
Na latuza saikin tu maaz a sasbinaz-ikitan hai na makutudii masa taululushu a hazam-paindazuan makinlansan mudaan. Supah a laihaibas sia a dalah-malisbintuhan at supah a painunanahtungan a mavavaivi a kanaskalunis saduan a bunun.
Maaz a malngangaus a dalah-malisbintuhan a hai katdaan dau tu tatinis Unti. masa taunadii dau a sasbinaz-ikitan hai salaz dau a saia paknuan mas Untitia tu sukduin a kasuun saintin. Sihalmang dau a sasbinaz-ikitan at na mudaan dau dii hai paknuanang dau a saias Untitia tu ung at mudaanin a kasuun saintin.
Maaz a saidaas sia a malan’unu a dalah-malisbintuhan a hai katdaan dau tu tatinis tavaaz tu bunun. Tupaus sia a dau a sasbinaz-ikit a tu maku’unias isuu tu tanasvilitia tu ima ti’unis isuu tu tanaskauntia tu imatia, tuza tu masa mapakimaupa a sasbinaz-ikit a hai tupa a saia tu “uninang i kipahpah a kasuun, tuza haangas kasuun tu samaslingku. ”
Maaz a malantauin a saidaas sia a dalah-malisbintuhan a hai katdaan dau tu tatinis tapudavus tu bunun. a maaz dau a siaan tu bunun hai ka kaupas davus a alkaputan kaupakaupa hanian at Tupa dau tu tis’uni dau a siaan huhud mas davus i aupa aiza dau a na asaus sia sipungul. Na asaus sia dau a isaitia pailis’unias kaz’av a sipungul i aupa maz’av dau a saia mais maupatia tu ka kaupakaupa misbubusukis hanian.
Maaz a malanpat a saidaas sia a dalah-malisbintuhan hai katdaan dau tu tatinis tatansushaimangsut tu bunun. kaaz dau a siaan tu bunun ka kaupas masasipul mas sisipulun at mapapatas mas patasan-ispithassui. Nii dau a saia pan’u’utung masisipul mas bintuhan tu isiaan sia dihanin i tupa tu maaz dau a isiaan sia dihanin a bintuhan a hai isaitia dau amin.
Maaz a malan’ima a saidaas sia a dalah-malisbintuhan a hai katdaan dau tu tatinis mapapatus kantinghui tu bunun. Mais taunasiaanin dau sia sanavan tu isdumdumin a dihaninan hai pisinghalus sia dau a isia daan a daan-tinghui a at mais kutunin tu ‘um’um tu matuduhlasin a dihaninan hai ishuunis sia a sapuz a. Aupa tupa tu maaz dau a adii a dalah-malisbintuhanan hai masmuav tu kaumasikit at mais maupatia tu si’ainunununu hai masmuav tu mabiskav daingaz. tismaupatia dau at maaz a idii mais tasa tu hanian hai na ka sikastasa tu taiktaik a kaiduluan mais tasa tu hanian. Hai, tupa tu, miahdi dau a mapatuskantghui a bunun a i nii tu mimis’u mapapatus tu ma’i’ishus kantinghuitia.
Maaz a malannum a saidaas sia a dalah-malisbintuhan a hai katdaan dau tu tatinis hansiap-dalah tu bunun. Maaz a isaitia dau a papaitasan a ahil hai supah a itudalah a ngaan a papaitasas sia at maaz a isaitia a papaitasasan hai masnasia ludun mas ning’av a papaitasas sia. Ung at, tupa sia dau tu “maaz a hansiap-dalah a bunun hai nii dau mapapatas mas sak’ivanis saduan tu haimangsut at kaupa daus nii tu minmazamaazav minmavaivivaivi tu ludun mas ning’av a patasan manghal. ” tinkuang dau a issasbinaz-ikittia a is’ang masa ta’aza tu maaz dau a lipuahan hai ka mu’iav dau mais saduan.
Maaz a malanpitu a saidaas sia a dalah-malisbintuhan a hai tupaun dau tu dalah- katbununan.siaan dau tu dalah hai masmuav dau tu madaingdaingaz tu dalah at katdaan dau tu tasa tu saba tu mas’an han tasa mas Unti at pitu tu masan a hansiap-dalh a bunun at masivaun tu suhis tu mas’an a tatansus-haimangsut a bunun at pitu tu saba tu suhis tu mas’an a tapudavus a bunun at tau tu sabasaba a tavaaz a bunun a katsiaan dalah-katbununantan. Mais iskaupatia hai na us’u’upa a bunun sia mapus’an tu sabasaba a madadaingaz a bunun. Masa niiang dau a bubunan usizaan mas dingkitan hai maaz a dalah-katbununanan dau mais tasa tu labian hai makusia dau tu masipatun tu han num tu suhis tu mas’an mas mapatuskantinghui tu bunun at na tudiipin dau malsisinghal a labianin.
Masa laupang dau a sasbinaz-ikitan taunasiaan sia dalah-katbununantan hai maaliduu dau a saias tasa tu madiav tu ivut siaan zazas tu dalahtan at tupaun dau a saias ivuttia tu mais lakuin tu hanianis taunadaaninas mas malaspus isuu tu dalah-malisbintuhantia hai tahua i na mahtu saikin mindangaz mas masuu.
Dungzavin dau a siaan taunasiaan sia dadangias bunun tu dalah masa latanglavin a siaan mas zazas tu dalahtan. Tinghuza daingaz dau a saia masa saduin mas pislipuahan tu dangian tu ima tu mas’an mas mamaszang tu lipuah-katliungan at ka idii dau a saia tinsaimangsaimang at niin dau haiap tu na tukua. Miliskin dau a sasbinaz-ikit a tu “makas’angik dau tu maaz a inak a lipuah-katliungan a hai mastan tu makitatini tu makitvaivi hai ka niiik haiap tu ka halmangaz hang a sia. Anatupa tu aizaanik mas lipuahtia at aizaanik tu tau mas ludun-mutahhaidangtia hai na nau tu niiik ama’ama min’unis ismangan tu sasbinaz-ikit. ” Sikulapa dau a saia sia ismut tatangis masa maupatadau dau a saia mililiskin.
Ung at, tudii dau hai ukas haiap tu maikusna'isa bis kukung a san’apav minsuma. Tupa dau a sasbinaz-ikit a tu “makuang is’ang a dau at tuzainin pasungkaviazta iahai! ” Antalam dau a kukung a tupa tu “niiangik mahtu pasungkaviaz mas masuu i mahaiulang a saikin. Mais saduankuas hai kazas ka halmangaz tu uvaaz at mais saduanik mas masuu hai kaazik amin ka maszang mas halmangaz tu kukung auh! Ung hai tu mais ka min’unik mas ta’a’aza mas masuu hai na min’unita mas mapa’a’akvut at na makitatinias tu makitvaivi mais saiduanku at na maupatia amin a saikin tu makitatini tu makitvaivi aminis saduas masu. ”
Tupa a sasbinaz-ikit a tu “mikui na pankaumanin a inak a hainainan at na asaang tadau kaudiipang dau mapasahalang mas duma tu bnun hai ?” Antalam dau a kukung a tu “laupak a dau dau a bunun hai niiin haiap tu na kilimang mas hanian tu na masingavang tus maaz, kaazin amin ka kausiaan sia babalivan mas kaisanusanin ka’uni tu haimnangsut mabaliv. Ung hai tu na ukas babalivan tu mahtu ubalivan mas pakadaidazan tu bunun siaan dalahtin, pahasia is’ukaanin a bunun mas pakadaidazan i. ” A maaz a sasbinaz-ikit a hai aupa nii tu mimis’u kausisia kukungtia mintitivi tantutungu hai dungzavin a kukung a min’unis maduazin ta’a’aza mas masaitia.
masa na mapatinlavazin a naia hai tupa a kukung a tu ukakivavang munanau a lipuah-katliungan a isia pislipuahan a sakakiv sadu. Masa sinaduin a sasbinaz-ikit a mas lipuah-katliungantia hai minmakitvaiviin a isaitia a saduas lipuah-katliungantia a. Tupaus sia dau a naia tu “kamuun hai ukua tu tatini a maszang mas inak tu lipuah-katliungantia, mahaiulang a kamuun i ukas bunun tu kananuang mindangadangazang mamuu. Haal a inak a lipuah-katliunganan ka tasa hai tu sastananku a saia sadu mas mamuu.saduav i pisi’alunku a saia masasusul mas danum at tutubukankus tutubu-tidanuman at sizaunku ma’uman a ivutaz a isiaan sia isaitia tu lutbutia a at mais palinanutu a saia hai sinungsivik ta’aza tu ung i tukukua bis siaan i aupa inak a saia tu lipuah-katliungan.”
Aupa na mapatinlavazin a sasbinaz-ikit a mas kukungtia hai tukakivus kukugntia a saia tu “saduav i maaz a mastan samadainganta sadu a haimangsut hai siaas nii tu saknuanis saduas matatin tu haimangsut, kaupaang is’ang a mahtu usaduan. Aupa dahdahaninas ka kaupas lipuah-katliungantia a palkadadas masuu hai min’uni a saias mastan tu samadaingan mas masuu sadu. ”
Masa tunahtungin a sasbinaz-ikit a mas isaitia tu painunahtungan sia siaan daantan hai tailvauinik tu pailaungkaduus paitiskulazan at taun’aminanku amin a inak a tausdidiipaun a danum a na hudan a. Tataskunik mas sasbinaz-ikittia kikilim mas laak-uanaulan siaan zazas tu dalahtan. Aupa ka makatnulim mudadaan hai ka islabainan a kaimin at san’apavin amin a bintuhan siaan dihanin.
Samangha a sasbinaz-ikit sanasiaan dihanin at tahuanik tu “maivia tu manauaz a bintuhananis saduan is? aupa aiza dau tu tasa a nii tu usaduanta a lipuah a idadazatia. Ung at, tinsuhdung dau a saia sananastu sadus zazas tu sanbaunas buantan at tupa dau tu”maivia tu manauaz a zazasanis saduan is ? aupa aiza dau a tasa a laak-uanaulan a malhabinhabin siaan sikvinsikvintan. ” Maupatia kaimin tu nii tu pa’u’utung mudadaan kikilim mas laak-uanaulan hai dungzavinim iduan mas laak-uanaulan masa tintus’ain a dihaninan.
Masa tudii tu sanavn hai tupa tu pinunsanin dau a sasbinaz-ikitan tu painasiaan sia dalah-katbununantin at na makutudii dau a saia mudaan musuhis. Ung at, samaminganku tu mani palinanutus madiav tu ivutia a saia. Masa isdumdumin tu labianin hai haiapik tu maaz a sasbinaz-ikitan hai maudaanin kausiaan sia na una’us sia tu dangian.
Maisimudaan a sasbinaz-ikit a hai na aizin tu punnum tu hamisan a saikin tu niiang sinadus masaitia. Ka haiapangik tu tinukakivanik mas masaitia tu “mais isiaan sia labian at samangha a kasuun sadus dihanintan hai saduav i na isainik siaan katdaanku tu bintuhantia malngingit malhainanhainan. na saszangan mas masuu amin a iskakaupa a bintuhanan tu malngingit mahainanhainan amin at maaz a kasuun hai na dangianan mas malngingit mahainanhainan tu bintuhan.”
Manaskal amin a pakadaidazanku masa sadu tu minhumisang a saikin musuhis at masantu’upa tu masial dau a inak a taisah, hai tu, mais inmantukunku hai makuang a inak a is’amg i Haal kai inindangazanku a sasbinaz-ikit a mapatas ka’unis itusidi tu tutubuk-ngulus, hai tu, sipungulunku a sinkus-hual a mapatas ka’uni. Haiapik tu na nii a saia ama’ama mahtu mapadangis tutubuk-ngulustia sia siditia. Idiip a inak a is’ang tu adu na kaunus siditia a lipuah a ? Minsasanik mais miliskin tu na isnavai bis sasbinaz-ikit a mais sanavan makututubuk-tidanumantia matubuk ma’angkut mas lipuahtia i na haiap amin a saia malkasiditan, tuza tu mais maupatia a inak a iniliskinan hai mani masizakuan amin a bintuhananan malngingit mahainanhainan. Minsasanik mais taunadaan mas is’ang tu mikua binis ka dunduan tu sipungul a saia matubuk mas tutubuk-tidanumantia i na ka uka a sia dau. Mais ka maupatia saikin miliskin hai maaz a isiaan sia dihanin a bintuhanan hai ka min’uni amin mas bahbah.
Maaz a kamuun a maszangku tu mazimas sasbinaz-ikittia a hai na haiap a kamuun tu na aiza tu tasa a nii tu sahalanta a sidi a isiaan sia dahvisan tu dalah-malisbintuhantia. Ka nii tu haiapun tu adu kaunus sia a lipuah-katliungan a ? adu nii tu kaunus sia ? hai tu na tismaupatia a dalahan mimavaivivaivi saduanta. Tanama kamuun samangha sadus dihanintia at miliskina tu adu kaunus siditia a lipuah a ? adu nii tu kaunus siditia a lipuah a ? na saduam tu tuza tu minmavaivin haang as saiduantan.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容