manu Ra’ani
Kanakanavu
miaa unʉmʉ cenana, ’ituumuru pacʉpʉcʉpʉnga maku poiisua rʉmʉra mataa vunai tatia. sua isi ia, iku tamna cau mamane mati-ucani niaritapasa: ’apacʉ’ʉrʉʉn maku kakanaa’ua niaritapasa, kesoniʉn maku nguani, ka’icʉpʉn kara? nakai, ’apui’i nguani kesoni ’ikua, neni tia ma’icʉpʉ carapung isi? makasua cu, aritapasʉn cu maku tisikarain: makasi ’ikua kakanaa’ua, ’akuni maritapasʉ isi, ’akia tia vurain, matimanʉnga kani kiatuuturu sinatʉ ’Amirika, macʉrang siasʉpʉrʉ, macʉrang ’ʉnʉ’ʉnai, sii sua isi kani ia, tia ’una vurain. imo, koo cu ku tuiisua katatapasʉ, kiatuuturu cu ku ’unting hikoki, tuiisua cu ka’unting hikoki.
miaa niaca’iva to’urua unʉmʉ cenana, ’esi ku Saharasamuo meesua, niaraka hikoki maku, te ku takacicin pacʉpʉcʉpʉngʉ tia pakʉnnanu mati’ʉnʉʉ’ʉna. rovana, si’icʉpʉ ku na ’ʉnai ravuku, koo pacʉpʉngʉ, akini taniara totasiasrʉ, ’una cau marimia’ʉ ’ikua, ’una tacini manu maksi ’ikua “uranoo ku maritapasʉ ucani takuisi” misee.
aranai miana, koo pa ku maritapasʉ takuisi, makasua cu, sumasupini maritapasʉ ’inia, nakai, makasi manu iisua, “aka! ka’aan ku tia makai ’una na vʉcʉkʉin taasiang sua voorakʉ vunai, takuisi sua kisaa maku. ” ka’aan ku makaan maa mati’ʉnʉʉ’ʉna maritapasʉ, ka’aan nguain pomanʉngʉ. sii, te pa ku mati’ʉnʉʉ’ʉna hikoki, ka’upu’upangʉ cu maku maritapasʉ ucani satu’u moovua ’inia, pasiin maku, ’esi tisikarain kisaa musu takuisi, koo kia pacʉpʉngʉ, ’esiava pomanʉngʉ ’inia. cucuru karanana sua manu iisua, aranai meesua patanganaiʉn maku “manu Ra’ani” kisʉʉn.
takutavarʉ’ʉ ku miaa marivivini cu, sua manu Ra’ani iisua ia, niaranaiava araceni tamutasai iaavatu, tamutasai iisua ia, makai kani tana’anʉin sikatatiain. nakai noo mkasia ku tumatuuturu kakanaa’ua ia, ’akia potucucuru kari maku. imo, noo makaa’ʉna ku poiisua isi ia, pasiin cu maku cau, sua manu Ra’ani ia, niaranai B612 kisʉʉn tamutasai, tamutasai iisua ia, niatʉnʉ miaa cenana 1909. sua kakanaa’ua ia, ’inmaamia tavarʉ’ʉ ’apaica sʉpʉrʉ, takutavarʉ’ʉ neni sua sikai tamna ’imi.
patangiriin manu Ra’ani nimʉmʉka na tamutasai. nimakacani kani na cucumeni tamutasai, ’una cau naraavarʉ, niroimi kee marisiki karu tatia tamna rapʉ, ’una kani ka’icʉpʉn niarapipining:
uranʉn maku maritapasʉ takuisi, tavarʉ’ʉn kani kee kʉmʉnʉ karu tatia tamna rapʉ, pakacangcangarʉ ’inia sua isi. nakai ’esi aka capʉngʉ, tia kara kʉnʉn takuisi vungavung mekue? kesoni ’ikua, vungavung mekue tamna tini, tavarʉ’ʉ kara miaacara ’inia, masii ka’aan kʉnʉn takuisi? ’esi ku ’isiungasi mati’ʉnʉʉ’ʉna hikoki meesua, pasiin maku: “vungavung mekue tamna tini, ka’aan tavarʉ’ʉ miaacara ’inia! ’esi ku ’isiungasi masini, ’akuni paraapusu ’ikua!”
aka cʉpʉngʉin makasi: “noo ’unain tacini cau, ’esi na ’itumuruana sikara tamutasai, karʉ’ʉn kee ’inmaamia cu ucani vungavung mekue, noo cʉ’ʉrʉʉn cu kee tamutasai iisua, pakamamanʉng cu cʉpʉngʉin. nakai noo nikʉnʉ takuisi vungavung iisua, sua cʉpʉngʉin ia, tia makai nima’ʉpʉ cu kavangvang tamutasai, makasi kasu, ka’aan kasakʉnʉʉn sua isi!” timanaʉn maku kariin, pakaka cʉpʉngʉ maku, ’atʉpʉn maku manu Ra’ani, tanʉrara ’inia, uranʉn cu maku maritapasʉ, sipivʉrʉkʉa ivici takuisi.
manu Ra’ani tamna tamutasai, ’una ’inia ucani vungavung mekue. tantanniara muranʉ marisiki tamutasai, rumaravisi karu tatia tamna rapʉ, pasa’ʉcai ta’apuru cimʉrʉ. ti’ingai nguain tamna ta’apuru cimʉrʉ, tavarʉ’ʉ moon ’inia cumaacapa ’iciuru. noo rovana cu ia, ’urupacʉʉn kee pania muvʉrʉkʉ, miaacara vungavung mekue iisua.
noo te cu aratʉkʉnʉ ia, pocanumuʉn kee vungavung, vʉrʉkʉn cu, pasiin cu kee “arasingsinga! te pa kita ’arupacʉ’ʉra!” misee. pasiin vungavung: “’arupacʉ’ʉra kitai! nakai aroo vʉrʉka, ka’aan ku tia’uruupaca ’inia. sii noo te kuin paratakanangʉ mataa ta’anna ia, masiiraru tia uparʉʉn kurai. ka’aan ku kangvang ma’icʉpʉ marʉkurapʉ, ’una ku sipatikocu.” ’apucanʉn cu kee manu Ra’ani, vanai sii ka’aan tia ’apacʉ’ʉrʉʉn kee, ’esi muru’ʉsʉ’ʉ nguain.
nipacʉpʉnga maku ia, manasʉ nikipapa tapinange hooniau, miaa araavari to’onaa. nimaica ’ituumuru tamutasai, nimatʉnsʉ karananana kacangcangarʉn cau.
maticusa tamutasai ia, ’una ’inia tacini ’apurangrang cau. pasiin kee manu Ra’ani, paritu’usuo ramucu musu mataa anani ramucu maku, ’apaica kariin matu’usu ’inia, makasi cu cau iisua“a’a! sosomanpe makacapʉʉcapʉ ’ikua, cucuruana kasu marʉ’ʉ ’ikua.”
matituru tamutasai ia, ’una ’inia napaa’ici cau, tantanniara maa karapa’ici. vanai nguain tia karapa’ici, sii tia roimi. tia roimiʉn kee nguain tamna maraini, sii maraini kani makaasua tantanniara karapa’ici.
matisʉpatʉ tamutasai ia, ’una ’inia tacini katamia’aa cau. tantanniara moon ’inia sumasʉpʉrʉ mataa marisinatʉ sinipʉrʉa kee. ka’aan tarasangai sumasʉpʉrʉ na kakangca tamutasai, makasi, nguain tamna kani kavangvang tamutasai.
matirima tamutasai ia, ’una ’inia tacini matupupuru cau. tantanniara rovana tia patipuruʉn kee cacanʉ tamna ’apuru, a’ʉpʉn cu kee noo totasiarʉ. ti’ingai sua tamutasai, mara’an takusʉrʉ, iimua, sua cani taniara ’inia ia, makai cani vʉncung maa, mupacai sua matupupuru cau, sii ka’aan tavarʉ’ʉ tarasangai, tia matupuru, tia ma’ʉpʉ ’apuru.
matinʉmʉ tamutasai ia, ’una ’inia tacini singmung kingkio ’ʉnai. ’ituumuru cu niarisinatʉa kee nganai ’ʉnai, ’esi ’inia kavangvang nganai cimʉrʉ mataa cakʉran. makasi cau iisua: “ka’aan kani arisinatʉn sua mara’an ara’akia, ’inmaamia arisinatʉn sua ka’aan tia ara’akia cimʉrʉ mataa cakʉran. ” aka cʉpʉngʉ tumatimana sua manu Ra’ani, sii vungavung ia, mara’an kani ara’akia.
nikusaa manu Ra’ani mati-upitu tamutasai ia, ticio. tatia sua iisua tamutasai, ’una ’esi ’inia cani mʉna maan ucani Ra’ani, upitu meetusa singmung kingkio ’ʉnai, masiʉn me’i katamia’aa cau, upitu nʉmʉ me’i cau napaa’ici, uturu ’ii cau ’apurangrang, kanganganʉ manasʉ ’una mapusan ’ii kakanaa’ua cau. miaa koo pa ’uruupaca tenki ia, ’esi na ticio, tia ’una masʉpatʉnʉ usʉʉpatʉ me’i cau matupupuru, masii ka’aan cu mapitʉ’ʉ rovana.
miaa canpe mookusa ticio manu Ra’ani ia, nimatʉnʉsʉ na ravukuvukua, ucani takupiriipiri vunai. pasiin vunai sua manu Ra’ani: “noo ’unain ucani taniara, pacʉpʉcʉpʉngʉ kasu tamutasai musu ia, tavarʉ’ʉ ku muranʉ kasua.”
nipaica kee kavangvang ravukuvukua ’ʉnai, marivivini cu makacʉkʉna na to’onaa cau. cinimʉ’ʉra manu Ra’ani ucani tamʉkʉa vungavung, niarakicacʉ! ka’aan cu tavarʉ’ʉ pokariikari. ’una ’inia urima meetusa vungavung mekue, matʉʉtʉa kavangvang. pacʉpʉngʉ manu Ra’ani: “sua cʉpʉngʉ maku ia, ’inmaamia iku ’una mekue, ’itumuruava nesi, ’apaco’e ’una ku vungavung, uturu ta’apuru cimʉrʉ, nakai koo ku tuiisua porangrangʉʉn manu Ra’ani.” makaasua nguain pacʉpʉcʉpʉngʉ, matakuviri cu na racʉcʉna tumatang.
niarapipining cu taamcuru meesua. pasiin manu Ra’ani: “ivata! arakukunu kita sumasima’ʉ, aka cʉpʉngʉ maku masini.” mariivari taamcuru: “ka’aan pa ku tavarʉ’ʉ arakukunu kasua sumasima’ʉ, koo pa ku niparinsiu. iku masini cumacʉ’ʉra kasua ia, manu tati’ingi maa, maatʉa, cumacʉ’ʉra kasu ’ikua, ’aa! ucani taamcuru maa. nakai noo ’aparinsiu kasu ’ikua, te cu kita ’apakacarʉ. tia iikasu maa ikacarʉa maku, iku tia ikacarʉa musu.”
makasi manu Ra’ani: “ka’aan musutanpʉ takananga maku, te pa ku mocacaca patarakanangʉ tangria cucumeni.” makasi taamcuru: “cau masini, ’akia cu takanangain, tia takutavarʉ’ʉ cau cucumeni. ’inmaamia tavarʉ’ʉ mookusa tamia’aa pupu’a. nakai, kavangvang sua tamia’aa ia, ’akia uacani ’esi mapu’a tangria, iimua, ’akia cu cau tamna tangria.” tantanniara manu Ra’ani mookusa ’inia cumacʉ’ʉra taamcuru, makasua cu niparinsiu cu kee taamcuru, tumatimana kariin.
mataarava cu tia aratʉkʉnʉ taniara, pasiin taamcuru manu Ra’ani, mokusaa pa tamʉkʉa vungavung cumacʉ’ʉra mekue. makaa’ʉna cu manu Ra’ani cumacʉ’ʉra mekue, niarakaranana cʉpʉngʉin. pasiin manu Ra’ani mekue neesua: “ka’aan kamu makai iku tamna mekue, ’akia cau niparinsiu kamua, ’akia cau vanai kamua nikipatʉsʉ. ’apaco’e ucani maa iku tamna mekue, nakai masakʉn ku ’inia. patangiriin maku miaacara, pucanumu, ’uruupaca pania mavʉrʉkʉ, ’apucanʉ na tina’anʉin kurai, ’api’iarʉn maku maakari, iimua sua nguain ia, iku tamna cucuru vungavung mekue.”
te cu aratʉkʉnʉ manu Ra’ani, pasiin taamcuru: “arasingisngaa kʉcʉ! sua cucuru kasakʉnʉʉn nonoman ia, ka’aan cʉ’ʉraʉn vo’in, tia ’urupacaʉn cʉpʉngʉ cumacʉ’ʉra. cʉ’ʉraʉn! kipaatʉsʉ kasu na vungavung mekue musu, iimua, kasakʉnʉʉn cu musu mekue iisua.”
miaa tumatimana ku nipaicaa manu Ra’ani isi ia, mati-u-aru taniara cu ku nimusutupuku, nikaravangvang cu maku canumu. maracocua kim tassa mocaca na ravukuvukua, te kim tikirimi tacanumua. makasua cu mocacaca, niarapitʉ’ʉ cu kakangca, arapipining cu tamutasai.
cumacʉ’ʉra na kakangca manu Ra’ani, makasi ’ikua: “cucuruana maningcau tamutasai, vanai sii, ’una ’inia ka’aan mita cʉ’ʉraʉn ucani vungavung.” mangucunu pa nguain, cumacʉ’ʉra niparisinangʉ vuanʉ ravukuvukua, makasi: “maningcau sua ravukuvukua, sii tia ’una na cikiringain ucani tacanumua.” makaa’ʉna kim mocacaca, miaa te cu araciasʉ taniara, cinimʉ’ʉrʉ cu kim tacanumua.
rovana meesua, mataarava cu nivatua manu Ra’ani na ticio, ucani cenana. ’esi mati’arangʉ nguain tia pui’i, cʉ’ʉraʉn maku, makai ’esi maakari mataa takupiriipiri vunai. vʉrʉʉngana cu, tavarʉ’ʉ ku, ’acee cu manu Ra’ani.
nimaca’ivi cu unʉmʉ cenana, koo cu ku cumacʉ’ʉra manu Ra’ani iisua. atʉnʉngʉ ku marivivini kariin ’ikua ia, makaasia: “rovana, noo cumacʉ’ʉra kasu kakangca, ’esi ku na ucani tamutasai, ’esi ku na tamutasai iisua maacaca, iimua, te kasu pacʉpʉcʉpʉngʉ, makai tamutasai kavangvang ia, ’esi cumacʉ’ʉra kasua maacaca.”
macangcangarʉ tangria maku, makaa’ʉna cumacʉ’ʉra ’ikua ’una pa ngisaa pui’i, mamanʉng kani ’incu maku, nakai, ’esi ku parʉrʉ’ʉ cʉpʉngʉ. nimuranʉ ku manu Ra’ani maritapasʉ siavʉrʉkʉ ivici takuisi, nakai niroimi ku maritapasʉ ’inia tarisi, ka’aan nguain tia tavarʉ’ʉ mumʉnʉ siavʉrʉkʉ iisua. paira ku pacʉpʉcʉpʉngʉ, tia kara kʉnʉn takuisi sua vungavung iisua? ’apanapa pa ku pacʉpʉcʉpʉngʉ, tia vʉrʉkʉn manu Ra’ani sua vungavung iisua, tia iacaraʉn kee kavangvang takuisi. makasuin ia, tia masiikusa ’ikua kavangvang tamutasai maacaca. nakai, ’esi pa ku pacʉpʉcʉpʉngʉ, ucaniava ’una ucani taniara, roimi nguain muvʉrʉkʉ ’inia, te cu makananu? pacʉpʉcʉpʉngʉn isi, makai ’esi muru’ʉsʉ’ʉ kavangvang sua na kakangca tamutasai.
makai iikamu maatʉa manmaan na manu Ra’ani, ’esi na araceni tamutasai, ’una ucani ka’aan mita tarakanangʉn takuisi, manasʉ nikʉnʉ kee vungavung mekue iisua, manasʉ koo nikʉnʉ, sikai mita isi, te cu arakaranana. aratakarʉo navungu cumacʉ’ʉra kakangca, pacʉpʉngʉan, makananu cu kusai vungavung iisua? nikʉnʉ takuisi kara? koo kee kʉnʉn! masini, te cu kamu pacʉpʉngʉ, niarakaranana cu mamane isi.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容