sunis na qungti
Kavalan
unem tasaw ku, muwaza ti kenasianeman ku tu zana naung seRai siqay. zau zana qenabinnus ku saqayaw ay nitulisan: alan ku pa tayta tu baqian tenulisan ku, sanuan ku maytis imu ni zin ku. timangu nizu semanu timaikuan, kubu nianu ma qaytisan? nani umanan ku ti temulis teReq na: baqian semanu timaikuan naRin temulis tu zau mai tu ngayaw ay, paqangi ka sinanam tu zana amilika、sabidang ay、zana lawlaw sudad. taRta Raylikuz mai ti iku Rapatulisan, matiw ti ku sinanam pasaqay tu puysun. meRa pasaqay ay tu puysun ti.
ngayaw na unem tasaw. yau iku ta sahala samu buqbuqanan silanas. meRapsi puysun ku, aiku ti kasianem semangi. tuRabi maynep iku ta buqbuqanan, mai makasianem, semuRap taRbabi timangu yau lazat minaR timaikuan. yau paqenanem sunis sikawma timaikuan "panmu iku temulis tu sizi"zin na.
qeniyan mai pama iku temulis tu sizi, muman ti ku temulis tu saqayaw ay sizi. timangu sikawma aizipna"sukaw!na’ay ku tu tabedesan yau usiq maRung ay unung qabaw siqay. ngid iku tu usiq sizi."zin na. qatani iku temulis, mai melaqid ta aneman na. melazuk iku semangi tu puysun ku, pisapatan ku ti temulis tu haku bula timaizipan na sanuan ku ta teReq sizi ’nay, timangu melizaq aizipna. tatezuma ay lazat sunis zau, Raylikuz pasinanganan ku aizipna tu sunis na qungti.
Raylikuz qawka iku suppaR, aizipna maqezi ta usiq medawed kitut ay butedan mawtu, butedan ’nay mai Raya tu utani tu izip na. wanayka nazauan ku sikawma pasuppaR tu baqian timaizipan na nani, mai tu sazmaken ay tu nisikawman ku. taRta Raylikuz semanu iku tu ’daq, sunis zau maqezi ta B612 butedan, butedan zau ta 1909 tasaw matayta. baqian meniz wantima maqezi ta tunekan suppaR tu tenub na banang ay waway.
sunis na qungti satawaR aizipna tu ta butedanan ay naququni ay penaluman. yau qausiq, zuma ay butedanan, yau paqenanem buqaRes ay lazat kalingunan na pasaya menimen tu Raya ay tisan na paRin, Raylikuz mezuka ti qaytisan ay lanas. ni panmuan ku timaizipan na temulis ay sizi, nengi qeman tu tisan na Raya ay paRin, melizaq anem na. wanayka melaydaw aizipna, mangay qanan na sizi salitun ay simau. semanu aizipna timaikuan, litun na simau qadiatip na mai qa qan na sizi. yau iku semangi tu puysun ku, sanuan ku aizipna " litun na salitun ay simau mai tu ngayaw, yau iku melalibed. naRin isu mala tu nazau mai tu niana ay lanas meRusiR timaikuan."
taRRaw ti anem na semanu " azu yau lazat ta melalazan uu banan betedan, melizaq tu usiq mai tu saqazusa ay salitun ay simau, wanma temayta tu butedan, nengi ti saiya na kasianem. wanayka azu qatiwan na sizi qeman simau ’nay,ta aneman na kasianem, azu ti butedan meniz niz ti muzep,manna mai tu niana zin su !!" taRRaw anem ku mipil tu paRuan ku ti aizipna pemupuk, panmuan ku ti sizi na temulis tu usiq qubqub na ngibiR.
ta butedanan na sunis na qungti, yau usiq salitun ay simau qemizuwan. pitemawaR aizipna manmu seminap tu butedan, temutus tu melubas ay tisan na Raya ay paRin, menimen tu Ramaz ay naung. kitut zana ay Ramaz na naung, nengi paRetikan tu tiRuR. temuzus ti tu Rabi izana tu galas ay nukub meRebu tu salitun ay simau.
ngid qatalin tu butedan, panmuan na pananum salitun ay simau, nukuban na tu galas ay nukub, sikawman na " paqangi ka." sikawma simau timaizipan na "wanay. sepaw ika nukub ’nay ta kinilan, mai ti ku ngid iyung timaizipan na. azu ngid iku simqananam tu pulaw, qawman nabetan ta sabasus ay qeluqut ta izipan. mai ku maytis tu pasan qaya, yau kames ku." melazuk aizipna pa qawi tu sunis na qungti, wanayka maytis aizipna matayta na tu saRusi ay waway.
sazmaken iku tu sunis na qungti kemulikuz tu melaziw matalin ay adam meRaRiw mezukat. muwaza senaqayan na melaziw tu butedan, matayta naququni ay qatawan ay lazat.
saqa usiq butedan yau paqenanem qungti qemizuwan. maseq sunis na qungti tayan, pemalez qungti timaizipan na. mai sekilan na sunis zau aizipna, muazing qatalin tayan, nani temunuR ti qungti tu qatalinan na.
saqa zusa butedan yau paqenanem melizaq tu zaisan ay lazat. semanu tu sunis na qungti kawili ay lima tingiw ika kawanan ay lima su zin na. kulikuzan na sunis na qungti ni sikawma na, sikawma ti aizipna " wanay penaqpaq su, muRebu isu timaikuan." zin na.
saqa tulu butedan yau paqenanem meRawteR ay lazat qemizuwan, pataz qeman tu Raq. qeman aizipna tu Raq ngid kalingun. ngid kalingun tu sikazna, kasianem aizipna pataz ReyRaq qasikazan.
saqa sepat butedan yau paqenanem temiyam ay lazat qemizuwan. pataz aizipna subidang seRai semudad tu tengi. mai hibang subidang tu ta dedanan ay butedan aizipna, semanu aizipna butedan ’nay nizu zana ay.
saqa lima butedan yau paqenanem puRas ay tu sinut lazat qemizuwan. piRabi aizipna paquRas tu sinut na lazan, taRbabi uzepan na. wanayka kitut butedan, qasiR kemuliseng, taRta tayan ay saqabian wama satunek ma qena maRung na. paquRas ay tu sinut lazat pilay pataz paquRas tu sinut、 muzep tu sinut.
saqa unem butedan yau paqenanem kemingkiw ay tu lawlaw lazat qemizuwan. ta sudadan na muwaza ni sudad na ta niniyan ay damu nangan, Raytu naung seRai iRuR ay nangan. semanu aizipna "kemingkiw ay tu lawlaw lazat mai semudad tu sanangan mezukat ay lanas, wama semudad tu Rayngu meliwaliw ay naung seRai lazing." ipilan na ni sikawma na, melaydaw ti sunis na qungti tu simau ay lanas.
saqa pitu ni qaseqan na sunis na qungti ay butedan ’nay qizuwanan na mazemun ay lazat lawlaw. ’nay usiq Raya ay lawlaw, ta lawlaw ’nay yau Rasibu Rabetin yau usiq qungti qemizuwan, upitu melalazan kemingkiw ay tu lawlaw, usiwa betin banan temiyam ay, upitu Rasibu banan meRawteR ay, utulu yikan melizaq ay tu zaisan, yau uzusa betin yikan meniz baqian. tangayaw mai pama tu dingki, lawlaw ta meniz ngid tu usepat betin yau unem banan lazat paquRas ay tu sinut na saqadanan qawka qemidat tuRabi.
sunis na qungti Ruqaseq ta Raya ay lawlaw, ta bubuqanan mezap tu Rapedadaw ay siqay. siqay ’nay semanu timaizipan na "azu yau usiq dedan sizenges isu tu butedan su, nengi iku manmu timaisuan."
melaziw ti aizipna tu meniz buqbuqanan, qawka maseq ta yau lazat qemizuwan ay qaizuwanan. sunis na qungti zau matayta na usiq qaizuwanan paluma tu simau, muRetut tu Raingu sikawma. timangu tayan yau ulima melalazanan salitun ay simau, nizu sasetaR waway na. kasianem sunis na qungti "zaku ay salitun ay simau wama usiq ma sayza zin ku, mai makasianem nayau ma aizipna senaquni, sinangan iku tu yau ’nay simau, seRai utulu Ramaz ay naung, wanayka zau meniz mai ku satuRin meRa saRaya ay sunis na qungti. kasiasinem aizipna, suqebqeb ti ta melanay ay suway muRing.
zau duki mezukat ti quyu. sikawma ti sunis na qungti "awRi sikaput iku mawRat ka, metaRRaw anem ku setangi."zin na tu quyu. sikawma quyu timaizipan na"sukaw iku matapun timaisuan mawRat, mai pama iku mekalus. ta aneman ku temayta timaisuan, Runanay ay ma sunis aisu, ta aneman su temayta timaikuan, quyu ma aiku. azu makalus su aiku, simqa ngidan ti ta. ta aneman ku temayta timaisuan, aisu mai ti tu saqazusa kiliman, ta aneman su temayta timaikuan, aiku mai ti tu saqazusa kiliman."
sikawma sunis na qungti "mai semin duki ku, ngid iku qatiw simqananam tu qamazemun ay kaput." sikawma quyu "tangi ay lazat mai ti ma tu duki mesuppeR tu naququni ay lanas. qaniau nizu matiw sa tiyam meRas tu pamengan ti ay Ribang. wanayka ta tenub na banang, mai tu tiyam yau baliw ay tu kaput, taRta lazat meniz mai ti tu sikaput ay." sunis na qungti pitemawaR ta ’nay duki matiw temayta tu quyu ’nay, nazau, Raylikuz makalus na ti quyu ’nay.
maseq ti tu qasaRiwayan, qatiw ka ta paluman tu simau temita muman tu salitun ay simau zin na quyu timaizipana. sunis na qungti muman matayta salitun ay simau, ta aneman na yau ti zumma ay kenasianeman. aizipna sikawma tu qaniyau "aimu mai asetaR tu zaku ay salitun ay simau, mai tu lazat mekalus timaimuan, mai tu lazat paqeseR timaimuan. zaku ay salitun ay simau, wanayka usiq ma sayzi, mesuqas pama aimu meniz. saqatung iku pananum, nukuban tu galas ay tub, baqsiw tu ta izipan na ay qeluqut, pasaya mipil tu sikawma na, azipna zaku ay salitunay simau."
sunis na qungti mateng tu quyu, sikawma quyu timaizipana "wanay, makken qaninanan ay Ribang, mai qatayta na mata, wama si anem qawka matayta. pizian su duki ta salitun ay simau su, taRta nazau ti qaninanan."
pun iku mipil tu nelaziwan na sunis na qungti ay kungku, saqa uwalu ti dedan ni silanas ku, ’nay duki zanum ku Raylikuz ay usiq timak maniz ti menanum. sunis na qungti seRai aiku masulun semaqay ta buqbuqanan, ngid imi kilim tu usiq lasung. semaqay muman semaqay, wiyati paqanas tedem, mezukat ti butedan.
sunis na qungti situqaw temita tu dedan, nani sikawma timaikuan "simqena butedan, ta babaw na yau usiq mai qatayta ta ay simau." aizipna situRku temita tu ni qidat na bulan tu buqbuqan, semanu "buqbuqan nani simqena, ta niyan ay tuqus nani, manubi usiq lasung." muman ti imi semaqay, Raylikuz teRi ti mekala ti imi tu lasung.
dedan ’nay Rabi, qenaseq na sunis na qungti ta mazemun lazat ay lawlaw tu satasaw. muazing aizipna tu zau qaninanan ay duki temanan, matayta ku aizipna seRai ’nay Rapedadaw ay siqay sikawma. qatedem pa ti, suppaRan ku sunis na qungti matiw ti ta nisimsanuan ay lanas.
melaziw ti tu unem tasaw, mai ti ku muman temayta tu sunis na qungti. kasianeman ku Raylikuz nazau nisikawma na timaikuan "tuRabi, situqaw isu maRaw tu dedan, yau iku qemizuwan ta usiq butedanan, yau iku metawa ta butedanan, tamaisuan temayta azu metawa meniz butedan. qenayau su ay butedan, ’nay suppaR metaw ay butedan.
kaput ku meniz muman temaita timaikuan, melizaq tu binnus iku temanan, wanayka teReq na anem ku metaRRaw. umanmu iku tu sunis na qungti ay sizi temulis tu qubqub na ngibiR, wanayka kalingunan ku temulis tu balun na, naqunian na mai tu Rassi patusung tu qubqub na ngibiR ta sizian. pataz kasianem anem ku, simau ’nay maqan na sizi mani? yau zuma kasianem iku, sunis na qungti pitemawaR Rabi qawman nukuban na tu galas simau ’nay mediyatip, qawman tenuRan na sizi ’nay. nazau nikasianeman ku, metawa ti meniz butedan. yau zuma muman iku kasianem, azu qumni dedan mai satawaR, kalingun menuku tu galas, qa mai ti. kasianem taziyan, ta dedanan ay butedan niz ti RaRusi.
patungayaw timaimuan asetaR melizaq tu sunis na qungti ay lazat, ta ’nay medaud ay butedanan, yau usiq mai qananaman ta ay sizi, aizipna pasi qanan na ti salitun ay simau, pasi mai maqan, azu naquni meliwaliw waway na tenub na banang meniz qamai ti sasetaR. situqaw pa ita temita tu dedan, paqangi kasianem, sizi ’nay qanan na ti simau ’nay uu mai pama qanan na simau ’nay? zau duki meziyas ti imu, meliwaliw ti meniz mai ti sasetaR.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容