yawan na walrak
Nanwang Puyuma

enem driya ku ami i,matemuy ku kiniyangeran kana kawikawi aw kana unan na yaulas. idrini i, amau nanku nilribakan temutrautrau. ku panauwanay dra maidrangan ku tinutrautrau. “adri mu inedang?” ku kayaw i, “a kabung idru i!inedang ta dra manay!” kema. driyama ku telruay driya temutrautrau panau. adri tutrautrau dra kemadri dra uniyan dra pauwayan kema nadru na maidrangan.ladaladam dra temarabalraka aw dra aaipan dra tilin kema. driyama, likudran lra i, adri ku mututemutrautrau. muka ku meladaladama pubii dra hikuki.aw mitrepa ku pubii dra hikuki lra.
pakanguwayan dra enem ami i,kadru ku i sahalasamo.mulelep ku dra kuwatisan. mukuwatis ku hikuki i,kuyku na kemiyanger semeket pakainaba. aremeng i, kadru ku i samo alrube. dadaman dra semaluwan i, adri ku pakiyanganger dra ulraya a trau a benabalruk kanku.kadru a walrak kemadri kanku, ”patalruan ku driya temutrautrau dra siri.” kema.
adri ku driya temalram temutrautrau dra siri. driyama,masalr ku temutrautrau kanku pinalribakan na unan panau. kemadri kanku, “adri inaba! adri ku sagar dra ulraya a unan i sabak kantu tiyalr. sagar ku dra siri.” paresama ku temutrautrau i,adri penauwa kantu wanger. ku maagelran semeket kana hikuki i,ku paterasay elra temutrautrau dra trabak beray. ulraya a siri i sabak ku kayaw. salaw semangal idri na walralrk. idri na walrak i, kirekameni dra trau.likudran lra i,yawan na walrak ku kayaw pungalad.
likudran lra, malradam ku lra. idri na yawan na walrak i, a kemay i dawilr kana makiteng na sinciw. idru na makiteng na sinciw i, maramatrina dra paranak kantu dradrek kana yawan na walrak. amawna, an marengay ku pakalradam dra maidrangan i, uniyan dra pakupanaan kanku ngai a trau.likudan i, kema ku lra benabati dra trau.idri yawan na walrak i, a kemay B612 na makiteng na sinciw. idri na makiteng na sinciw i,amau tu pinatrebungan ninauwan dra trau a 1909 amiyan. na maidrangan i,kemay kana aaipan malradam kadri punapunan dratu pauwayan.
i yawan na walrak i,salaw temaranapaw kadri sinciw kana marekamenimeni na tralun na kawi. pariyasalr lra, kana druma na sinciw i, kadru a matuka a trau.abalu mapetr dratu adang kana kawi. likudan i mulelep lra dra kiyandangan. ku tinutrautrau na siri i,maruwa mekan kantu adang kana kawi. semangal idri yawan na walrak. amawna, maulep kemiyanger dra, “tu aekani na miyalrigaw na aputr nay?” kema. aw kiyumalr kanku, na miyalrigaw na aputr i, tu lrigaw maruwa emalaw kantu aputr dra adri kiakan kana siri? mabangabang ku dra saseketan dra ku hikuki i, ku kayaw marengay,“tu lrigaw kana aputr i,amelri amamanay. ulraya a patrangal ku kiyakarunan adri bangabangi ku.”
tu sepelran dra tu wanger aw kemadri marengay, “ulraya a kudrul mangmang a triur, a sakuwadradru na triur tu kasagaraw i dru saya na aputr. an menau driya kanadru na triur dra merimarimat i, kasadeku lra tu wangr. an tu kanaw kana siri na aputr i,kamawan dra maebut na triutriur peniya. dawadri driya padrangal kemayu!” ku kuwatisan kemiyager dratu nirarengay i, ku reereay demuluus idri yawan na walrak.ku patalruay trautrauway dra talrusubung tu indan kana siri.
tu sinciw kan yawan na walrak i, kikadru a miyalrigaw a aputr.marayas pulrang semelrap aw benitrbitr dratu teliyu kana kawi. pakabulay kana mutuapuy driya na drenan. makiteng idru na mutuapuy driya na drenan.maruwa ta semiyandra bitrenun. an aremeng lra i, tu atrabaw dra garas na miyalrigaw na aputr.
an muwaburek i sinciw dar i,tu puenayay driya aw tu atrabaw dra garas na aputr, “marepanauwa ta driya!” tu kayaw kan yawan na walrak. “marepanauwa ta driya!” kema na aputr.“aeman na atrab.puwalaku!an maranger ku marekaladam kana tibalrbalr i,an tu alrapay ku dradrek.adri ku kiyaseker.adri ku indang dra matrina dra garamgaman.ulraya ku seki maku.”kema na aputr. tu agelraw puburek i yawan na walrak.a inedang pananau dra mugururus tu elu.
malradam ku idri yawan na walrak i,kurengan kana ayam na muwaasaasalr kikadru aw mupatraran. melibat dra sadru dra karekitekiteng na sinciw.patrepa dra marekamenimeni aw dra kasagasagar dra trau.
na palribak na sinciwi, kaadru a misasa a yawan.meredek i yawan na walrak i, ubilin kadri tu kayaw. adri tu pikiari kan yawan na walrak. aru waburek kadru i,tu bauyaw kana yawan puburek.
na pukadradruwa na sinciwi,kaadru a malangutr a trau. “nu lima na tarawiri i,pasalretraan kanu lima na tarawalran.”tu kayaw i yawan na walrak kandru na trau.kurenang kantu ngai. kemadri idru na trau, “nu patraetraay ku.semangalan aw nu seeranay ku.”
na pukatelu na sinciw i, kikadru a paraeraw a trau.tematedrer tremekel dra eraw tremeketrekel dra eraw idru na trau i, kemiyanger dra abaluwa ku dra ku igelayan dra trau kema.
pukaapat na sinciwi, kikadru a menaniwan dra manay driya a trau. tematedrer emaiaip timilitililr. aw adri madradranga maip kana triur. nadir na triur driya i, nanku peniya kema.
pukalruwatr na sinciwi,kikadru a mitrepa pudinki a trau. an aremeng i pudinkiay.an semaluwan i,tuebetay.makiteng na sinciw aw arei muliyus. an saya wariyan kandri na siciw i, kamawan dra saya trektrek tu ikabelakas. driyama,salaw maulep na mitrepa pudinki na trau.
pukaenem na sinciw i,kikadru a misasa a temakesi dra mitrepa kana darean na trau. kanantu tilin i,sadru tu tinililr dratu ngalangalad kana dare.na drenan lra aw na burelruwan. marengay dra, “na malradram dra darean i,adri tematililr dra lriketrian dra wayway.temililr kana adri mubabalis na drenan aw na ine.”kilrengaw i yawan na walrak i,maulep tu wanger kana aputr.lriketri tu wari kema kemiyanger.
na yawan na walrak i, meredek kana pukapitu na sinciw i,amau na matrina idru na sinciw.ulraya a saleman muketrep karasa dra misasa a yawan. pitu kudrul na mitrepa kana darean na trau. makaiwakudraw na menaniwan dramanay driya na trau. pituleman kudraw na paraeraw.tuluwakudraw na malangutr na trau. mukasakasa i, karuwa dra makabetran leman kudraw tu pinitrauwan. adri driya parebuwa dra dingki na trau kadri ticiw i, an kadru amakapetelr miasma dra miyanem kudraw na puwadingki na trau i, semenan an aremeng lra.
tu niredekan kan yawan na walrak kadri ticiw i,maretrebung dra melatri dra unan kadri samo. tu kayaw kana unan idri na yawan na walrak, “an sareedr yu kanu sinciw i,karuwa ku pulrang kanu”kema.
melibat kana samosamo driya, atrebung lra dratu kinakadruwan dra trau. nayawan na walrak i, menau dra saya dra apuaputran. magerareger dra mauliulid marengay. kadru a luwatra kudrulr na miyalrigaw na aputr. marisarisan peniya. kemiyanger na yawan na walrak, “alra mutukasa uniyan dra pukadruwa ku aputr kemaku i,aydru a sakuwadradru a aputr. kuyku i, ulraya ku aputr aw ulraya ku drenan na mutuapuy a tuluwa. adri ku driya maruwa maramakesekeser mutuyawan na walrak. kemiyaangeanger lra aw miyakupu kana tralutralun matrangis.
adrunu i, mupatrarng a kungkung. “alamu!kirepailrang kanku. salaw ku masepelr garem.”tu kayaw kan yawan na walrak. kemadri na kungkung, “adri ku karuwa kirepailrang kanu. adri ku driya kurenang dra parelrimalrimaw.yuyu i, a walrak yu driya. kuyku i,amelri ku a makeser a kungkung.an maruwa yu kiparelrimalrimaw kanku i, ulraya lra ta parepaaya.an kemadru i,matintin ta lra miyadruwa.
kemadri i yawan na walrak, “maranger ku muka malradrama dra kadruwan dra alialian. amawna, uniyan ku dra wari.” kemadri na kungkung, “na trau gerem i, uniyan dra wari malradam dra manay driya. muka i tiyam tremimaa kana dinawayan lra na manay driya. amauna, uniyan dra tiyam dra menaniwan dra alialian kadri punapunan. driyama, uniyan dra alialian a trau garem.” na yawan na walrak i, muka menauwa kana kungkung kana wawariwari driya. kemadri dra semeer kana kungkung idri na yawan na walrak.salaw sadeku tu wanger kana kungkung.
aru paretinanuwas lra i,uwa i apuaputran nauwi driya masalr na miyalrigaw na aputr tu kayaw kana kungkung idri na yawan na walrak.. masalr driya menau kana miyalrigaw na aputr i,mubalis paseket tu wanger kana yawan na walrak. kemadri kana apuaputr, “adri mu kamawan kanku aputr. uniyan dra trau dra sagar kanmu.uniyan dra trau dra maair kanmu. saya elra ku aputr i,marapadrngal driya kanmu. ku simeaw, ku puenayay, ku atrabaw, ku patalruay puwalak dra uled. aw ku kilrengalrengaway tu wanger i sabak.nanku aputr idri kema ku.”
aru kakawang lra dratu kawang na yawan na walrak.na kungkung kemadri kana yawan na walrak, “na kinapadrangalan na manay driya i, adri karuwa menau ta matra. maumau an mianger ta i,karuwa ta menau. nu simeaw semeket nu aputr. driyama yu padrangal menau kanu aputr.aw marepanauwa ta driya!”
benabati dratu batibatiyan idri yawan na walrak kalidalanan. peniyaku kilrengaw dratu binabatiyan i, penauwa draku inulelepan dra kuwatisan dra pukawalu wariyan. adru i, ku kipetedraw lra tremekel ku enay. marengan mi kana yawan na walrak.kemakawang mi kanasamo. auka mi mayaa dra tebun. kemakawang mi. araremeng na wari lra. mupatraran na triur lra.
piyalangitr semeer idrina yawan na walrak. aw marengay kanku, “salaw bulay na triur! ulraya a aputr a saya i isatr kana triur. amauna, adri ta karuwa menau.” aw gemelrep menau kana samo dratu sinenanan kana bulan. kemadri marengay, “bulay na samo! kaulralraya isuwa amulrasedr a tebun.” patrutru mi driya kemakawang. idadenan lra i, atrebung mi lra dra tebun.
adru kana rauban i,penauwa dra saami tu niredekan i sinciw kan yawan na walrak. penadan dra uwaburekan kandri na wari. kamawan ku dra menau dra kimadradrayar kandru na unan idri yawan na walrak. aremeng lra i, malradam ku dra masikasik lra idri yawan na walrak.
paelipas lra dra nenema ami garem. adri ku lra menaunau kandri yawan na walrak. pakiyanger ku dratu nirarengay a pulikudran. kemadri marengay kanku, “an semeer yu i langitr an aremeng dar i, kikadru ku kadru. ulraya ku kana triutriur i sabak.saaeru ku menau kanu. an menau yu i, kamawan dra saaeru peniya na triutriur an menau yu.”
menau kanku dra maruwa mubaaw muruma i. salaw semangal ku alialian. amauna, ulraya ku sepelran kanku wanger i sabak. ku pulrangay driya tremuri dra talrusubung tu siri kandri yawan na walrak. amawna, abalu ku tremuri dratu tatilu.an uniyan dra tatilu i, tu kakudai putalrusubung na siri! marayas ku kemiyanger dar. idru na sirii, tu aakani na aputr nay? an numa i kemiyanger ku dra, kana karauban driya i, tu atrabaw dra garas na aputr kan yawan na walrak.tu nanauwi semeket na siri. an kema ku dar kemiyangeri, na triutriur peniya saaeru semeer kanku. an numa i kemiyanger ku dra, kaymayay an abalu elra matrab dra garas kana aputr.walelep dra kakuwatisan na aputr i!an kema ku dar kemiyanganger i,na triutriur i langitr mutuaelu lra peniya.
muymu na sagar driya kan yawan na walrak. alra ulraya isuwa kadri kana sinciw i isatr. ulraya a saya ta kinaulidan a siri.alra tu kanaw lra na aputr.alra adri driya tu kani na aputr. na inetrab driya kandri na langitr na manay driya i,kuwarenang mubalis peniya. muymuna alialian, na anaanayan,piyaisatr driya semeer i langitr. aw kiyangeruidru na siri.na siri i, tu kanaw na aputr? adri tu kani na aputr?an puraket mu kemiyanger i kalaladam mu,tayta kadru i punapunan i marekainabanaba ta marebaabaaw ta simeaw ta kinakadruyan i bulay ta i punapunan.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容