tahtahoki'
Saisiyat
’ima korkoring ray SayboSi: tinal’oemaeh, komita’ ka bangbangolan ki kinba:ba:agan Siba:i’ ray ’ina’azem ’ima nonak. hini ’isa:a’ ma’an hino’alay ka hinoba:ang. hinoba:ang ma’an Sipakita’ ka tatini’, singozawen nak’ino’? paktikot ay? lasiya Sominibih Sa’, tatpo’ kano’ Siktikot! ’isa:a’ ray nak tatpo’an ’i:zo’ hoba:angen ka kapakSekla’. tatini’ ’omangang ’iyakin Sa’, ’izi’ hoba:ang ka ’inoka’ ka howaw, pakakreng tatoroe’ ka malno’amilika’, tatoroe’ ka kaSepe:an ki Sekla’ ka ’oemaeh, ’ima kayzaeh ka howaw. ’isa:a’ tabin tatngor ’okay hakamahoba:ang, rima’ tatoroe’ kamase:ez ka kamahomayap.
’ima Sahpi:ih SayboSi: tinal’oemaeh, ya:o ’ima homayap ’ay Sahala: ’ima mowahil ka bonbonazan. kamahayap kikay ’aewhay ila, ya:o nonak paskayzaeh somapih ka ’ima ’aewhay. ya:o nonak matawaw ’oka’ ka mae’iyaeh tatilhaehael. hae:wan Somir’al ray bonbonazan, ’okik ra:ami Selra: ila, bazae’en hayza’ ka mae’iyaeh ’omitol ’iyakin. kita’en ’aehae’ korkoring SiS ’iyakin komoSa’, “hoba:ang so’hae’ ka Siri’ ’iniman.”
yako ’okik ’ina homoba:ang ka Siri’, ’isa:a’ ila homoba:ang. siya komita’ Sa’, “ ’aewhay! ya:o kayni’ noka Siba:i’ tiyal ’i:zo’ hayza’ ka po:ong. hoba:ang ka Sapang Siri’ ’iniman.” ya:o monpilaz homoba:ang ’oka’ ka Sinarara’ nisiya. ya:o Somowaw ’am somapih ka kamahayap ’ima ’aewhay, ’isa:a’ Sihoba:ang ka Sarakopan, koSa’en Siri’ ha:aw ’i:zo’, siya Somiwa’ Siyae’ ila. hini korkoring nonak a tomalan, bi:il ila ma’an Siro:o’ Sin tahtahoki’in.
bi:il ila Sa’, ya:o ra:am ila tahtahoki’ min’alay kamra:waS ka bintoe’an ’oemaeh ’ima mowa:i’, hiza bintoe’an ’oemaeh ’ol’olae’an a tomal. So: ya:o ’am mayaka:i’ pakSekla’ ka saboeh, ’oka’ ka mae’iyaeh paka:i’ ma’an ka pinanabih. bi:il ila, So: ’am pakSekla’ ka ’aroma’ mae’iyaeh, hini(tahtahoki) min’alay i B612 ka bintoe’an ’oemaeh. hini ’aehae’ bitoe’an ’oemaeh ray ’ima 1909 tinal’oemaeh ’isa:a’ Sahoero:en Sekla’en ila. tatini’ ma’ tani hini kina:at mowa:i’ Sekla’ mita’ ka kinrowaSekan, kin’i’iyaeh ’ima nak’ino’an.
ni tahtahoki’ ka ’oemaeh sin’elan kaehoy, hibetel paskayzaehen malahang. hayza’ ray babih bintoe’an ’oemaeh kamamalahang ka rape: ba:in mangowip somapoeh ka ’ima Sahae’ noka kaehoy boway, sowiti’ pawngaeh ka ’oemaeh. ma’an hinoba:ang ’ini siya ka Siri’, kayzaeh nom somi’ael noka kaehoy binSi’ siya kinSiyae’ o siya tikot Siri’ ’am somi’ael ka pongaeh. siya somingozaw ’iyakin Sa’, Siri’ tikot ay ka ’iniyatateleng pongaeh? yako kayni’ ’aybolon, koSa’en “pongaeh ’iniyatateleng ’oka’ ka howaw.” So’o ’izi’ ’aybol ka nakhini’an, ma’an hayza’ kapatawawen.
siya ’omhowiS Sa’, “ ’ita’ mae’iyaeh ray ’ima ’akoey bintoe’an, Sarara’en ’aehae’ ’oka’ kapawhi:ilan ka pongaeh ’am koza’ kin Siyae’. pongaeh So: si’si’aelen noka Siri’ hiza bintoe’an ’am hawka’ pazeng ila. So’o komoSa’ ’oka’ ka howaw!” bazae’ ’isa:a’ pakSikar ila no tahtahoki’ ma’an Sihoba:ang ka nom koma:os ka ngabas no Siri’.
noka tahahoki’ ’oemaeh hayza’ ka pongaeh, kamasapoeh ka rape: hembel noka kaehkaehoyan basez miyalawa’ kamaminahek hapoy. nisiya kamaminahek hapoy, ’ol’olae’an, lal’oz pil’asay ka ’oesizo:. So: hae:wan ila nisiya noka ka’alingo’an hahmek hemeken pongaeh.
So: ’am lomamlam nisiya pongaeh poralomon, Sa’ pantapo’on noka ka’alingo’an Sa’, “papil’awan!” pongaeh ma’ tiSkobae:oh Sa’, “pil’awan o hahmek ’aSkan kabih, ya:o kani’ pantapo’on. So: ya:o ’am makakSekla’ ki papa:o’ ma’ ’am narmeS noka SibSiba:i’ hakama’en ka kin sora’. ’okik tikot ’oyaeh ka kaSiray ’oes’oeso’an ’ayam sini’ael, ya:o hayza’ ka tateleng.” siya Somowaw ka tahtahoki’ ’am’amoeh Sa’ila ila, siya kaSikar pakita’ ka tahtahoki’ mam porawSi’.
ma’an kinita’ siya ’ima tani kabkabaehae: mowa:i’, kalotngor rini, karara:an ma’ ’am ’akoey ka kinal’a:iSan, hingha’ ma’ ’am ’akoey ’oyaeh Sinahoero: ka howaw ki mae’iyaeh.
ray kinal’alayan ’oemaeh hayza’ ’aehae’ tahoki’ ma’ rowaSek risa:. tahtahoki’ potngor ila tahoki’ Sa’, So’o ’izi’ ila lamlam honay hini ila. tahtahoki’ himi’an, siya kayni’ honay risa:, tahoki’ Sa’, Somowaw ila, Sara:iw ila.
siya kaSkoraeh ’aehae’ naehan ’oemaeh. kita’en ’ima rowaSek ’aehae’ kamatalopa:an mae’iyaeh. komita’ ka tahtahoki’ Sa’, niSo’ kazi’ lalokama’ Sa’pan’a:iS ka ka’nal lalokama’. tahtahoki’ ma’ tani ka ka:i’, nak’isa:a’, siya mayaka:i’ ila Sa’, “ma’alo’ niSo’ ka pinapa’, So’o lomokor ’iyakin.”
kaSnakoraeh ’aehae’ naehan ’oemaeh kita’en ’ima rowaSek ’aehae’ kamabosok mae’iyaeh. sa’sa’ih ka hahila: romae’oe:, siya romae’oe: ka pinobae:aeh ’iyakina pawka’ ray ’ina’azem koSa’en kakSikar. sa’sa’ih ka hahila: romae’oe: ka pinobae:aeh mina pakSikar.
siya rima’ naehan ’aehae’ ’oemaeh kita’en ’ima rowaSek ka kamaSemepe: ka kakrangi’an, sa’sa’ih ka hahila: mam Semepe: siya toto’izing mam Semepe: ray kawaS babaw ka bintoe’an, Sa’ hiza binbintoe’an mina ’insiya’a’.
kaSkoraeh kinahae’an kita’en ’ima rowaSek ka kamatomono: ka hapoy. sa’sa’ih ka kinhae:wan rima’ tomono: ka kapahiyo’an ray ra:an, So: Selra: ila pazpazengeng. hiza’ ’oemaeh ’ol’olae’an a tomal haysaza’ matawaw hinibih hinibih, tomono: pazpazeng hopay a tomalan.
mowa:i’ kinahae’an ’oemaeh kita’en ’ima rowaSek ’aehae’ kamatatoroe’ ka ’oem’oemaehan. nisiya ray kina:at ’akoey ka ’oemaeh raro:o’, hayza’ ka koko:ol, ba:la’ rino:o’. siya mayaka:i’ Sa’, “ya:o ’okay ka:at ka ’ima’itoSan sin’elan. koma:at ka koko:ol ki wasal kamahaSa’ heSem.” tahtahoki’ bazae’ Sa’-- pongah ’ima ’itoSan ka sin’elan, ’az’azeman ray ’ina’azem.
tahtahoki’ bi:il ila ’inoSa’an ’oemaeh, sobae:oeh mowahil, hayza’ ’aehae’ kaboehoel o lampez o ’aehae’ ka tahtahoki’ hayza’ SaybiSi: siyan kamatatoroe’ ka ’oemaeh, monhae’hae’ ban kamaSemepe: ka kakrangia’an, SayboSi: o ’aehe’ ban ka kamabosok, to:o’ siyan ban ka kamangabas nanaw haSa’ matawaw, saboeh hayza’ San’iyaeh ban o ban ka mae’iyaeh. ’ita’ ’i’ini’ paskayzaeh ka kapahiyo’an ray kinrowaSekan ’oemaeh, ’am romoton monoSopat o SayboSi: ban kamatomono: ka hapoy ’isa:a’ hae:wan ’am hayza’ pakSelra: ka kinhae:wan.
tahtahoki’ baba:aw mowa:i’ rini ray ’ima mowahil bonaz,sasbong ka kin ’iniyaliyaSan Siba:i’. Siba:i’ komosSa’, “So: hayza’ ’aehae’ hahila: So’o maSriyae’ ka kinrowaSekan niSo’, ya:o ta tatilhaehael ’iSo’on.”
siya kal’amet ka ’ima mowahil bonbonazan, ’isa:a’ hayza’ ila ka kinas’asangan. tahtahoki’ Sahoero’ ka ponpongaehan homSoS ila. haysaza’ hayza’ haseb siyan ka pongaeh, sin'elan hingha’ saboeh. tahtahoki’ ma’azazem “ya:o pakomoSa’ ha:aw ma’an pongaeh ’ima’ siya a nonak ma’an hayza’ ka pongaeh, to:o’ ka kama minahok hapoy. nakhini ’iwa’ ay ya:o ’okay talsekel nom ha ’ima soba:ah tahoki’.” ma’az’azem ma’azazem, siya maStaba’ ray hinhinbetelan homangih ila.
’isahini kas’oehaz ila ka ka:ang a ’oerahan. tahtahoki’ Sa’, “ya:o ’aewhay ka ’ina’azem, wa’ila pakakSiyae’ ki ya:o.” ka:ang a ’oerahan Sa’, “ya:o kayni’ makakSiyae’ ki So’o, ya:o haysiya na tiSak. So’o ma’ haysiya nak korkoring, niSo’ kinita’ ya:o ma’ haysiya ka:ang a ’oerahan. So: So’o komohoway ila ’iyakin, ’ita’ hingha’ ila ka kin Sekla’. nak ma’an kinita’ So’o ’am ’oka’ ka ’aroma’ nom homobaz ’iSo’on. na So’o komita’ ’iyakin ma’ ’am hingha’, ya:o ma’ ’am nonak a tomalan.”
tahtahoki’ Sa’ “ya:o ’oka’ ka hahila: nom rima’ Sekla’ sowiti’ ka kapa’oenhaelan.” ka:ang a’ oerahan Sa’, “haysani’ mae’iyaeh ’oka’ ila ka hahila: nom Sekla’ ka howaw Somowaw ka hahila: rima’ ray katilbaebae:aehan kasi’aelen kakrangi’an. mita’ ray kin’i’iyaehan ’oka’ ka kaSpalawan tibae:iw ka kapa’oenhalan. ’isa:a’ ’ita’ mae’iyaeh ’am ’oka’ ila ka kapa’oenhaelan.” tahtahoki’ sa’sa’ih ka hahila: rima’ payrarongaw ka ka:ang a ’oerahan ’isa:a’ ka:ang a ’oerahan kohowayen ila.
nom rasiwazay ila ka:ang a’ oerahan tomrong ka tahtahoki’ Sa’ila naehan ray ponpongaehan Sa’hael ka pongaeh. tahtahoki’ ’ina komita’ ka pongaeh ’ina’azem ’okik hingha’ ki baba:aw ’ima sabelnga’ ka ’ina’azem. siya SiS ka ’ima haeba:an Sa’, “moyo ’okik nak ma’an a pongaeh, ’oka’ ka mae’iyaeh popowa’ ’inimon, ma’an pongaeh ’ana ’aehae’ nanaw, ma’an kalahangen, poralomon na’ homakama’ ka SibSiba:i’ Sirokrok, siya ra:am bazbazae’ ma’an ka pinayaka:i’ siya ’inmana’a pongaeh.”
’am rasiwazay ila, ka:ang a ’oerahan Sa’, “pil’awan ila, ’ima’ Sapang ka kakrangi’an, noka masa’ mina ’okay Sahoero:i noka ’ina’azem Sa’ Sahoero:on. niSo’ boeloe’ ka hahila: ray pongaeh moyo roSa’ ’oka’ kapayhae:ae’an.”
ya:o bazae’ ka pinanpanapih howaw sizaeh ’ina Saehae’ maykaSpat ila ka hahila: ralom ma’ ’il’ameten ila. ya:o ki tahtahoki’ ma’oenhael ’am rima’ komi:im ka kawnaraloman. manra:an manra:an kawaS ma’ ’iyasiwi’ ila, bintoe’an kas’oehaz ila.
tahtahoki’ Sana’itol komita’ ka kawaS Sa’, “bintoe’an kayzaeh kita’en, haysaza’ hayza’ ka pongaeh mita’ ’okay sasakili.” siya o komita’ ka bonbonazan. Sa’, “bonaz ma’ kayzaeh kita’en, ha:o ray kalihokan hayza’ ka kawnaraloman.” yami manra:an manra:an tabin Selra: Sahoero: ila ka kawnaraloman.
’aehae’ kinhae:wan, ni tahtahoki’ mowa:i’ mita’ kinrowaSekan ’oemaeh ’aehae’ ila tinal’oemaeh potngor ila kaklobihan. ya:o Sangahip siya ki ’ima’ ’aliyaSan Siba:i’ mam maehrahrang. hae:wan potngor ila, ya:o ra:am tahtahoki’ rima’ ila sasbong.
SayboSi: tinal’oemaeh Sahpi:ih ila tahtahoki’ ’okik ’ina sasbong ila. ya:o mahoero: yami nom rasiwazay ila pinayaka:i’ Sa’, “hae:wan So: Sana’itol komita’ ka bintoe’an, ma’an SinekSa’ ma’ haysaza’ ’aehae’ bintoe’an, ya:o mam sawsawa’an, niSo’ kinita’ saboeh bintoe’an Sinahoero: hingha’ ima’ sawsawa’an.”
ma’an kapa’onhaelan, komita’ ’iyakin ’i’iyaeh lobih, makakSiyae’, ’oka’ o ma’an ray ’ina’azem hayza’ ka kin ’omahowiS. ya:o mahoero: hinoba:ang ka Siri’ no tahtahoki’, hayza’ homoba:ang ka kaka:os ka ngabas o mangowip homoba:ang ka baya:, siya ’am nak’ino’ koma:os ka ngabas. rengreng ma’az’azem, Siri’ kayzaeh ay ’okay ’amet ka pongaeh. mak’aehae’ ma’az’azem tahtahoki’ sa’sa’ih ka kin hae:wan noka hahmek hemek ka pongaeh. Siri’ ma’ ’am hingha’ ka kinalahang, nak’isa:a’ ka ’ina’azem ray kawaS babaw bintoe’an saboeh ’ika parparana’an mam sawa’ hayza’ ka ’ina’azem, So: siya mangowip ’okay hemek ka hahmek, ’am nak’ino’ ila? ray kawaS bintoe’an ’am hahi:il ’ima porawSi’.
nak moyo saboeh ’ima hingha’ minowa’ hi tahtahoki’ ray kawaS babaw. Sinazezep ka bintoe’an, hayza’ mita’ ’inokay Sekla’i, Siri’ ’am somi’ael ay ka pongaeh a ’oka’, hini ray kin’i’iyaeh mita’ ’am ’oki’ hingha’. ’ita’ saboeh Sana’itol kita’ ray kawaS ’az’azem ray ka:ra’, Siri’ somi’ael ka pongaeh a ’oka’ ’isa:a’ moyo ’am Sekla’ ’ana kano’ ma’ ’okik hingha’ ila.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容