laqi thowlang
Truku
mataru hngkwasan mu siida, htngayan ku llnglung quri nraaw ni quyu qbibing. nii ka tgkingal rnisuh mu matas kndsan mu: pqtaan mu rudan ka rnsuhan matas ni slingan mu ksgun dha hug. kiya ni embrinah smiling knan ka kana dha, manu ksgun ka qbubu da? kiya do rsuhan mu matas ka ruwan na da: rmngaw knan ka rudan, iya risuh matas rnisuh matas ungat brihan nii, enduwa smluhay slhayan niqan brihan quri kari Amirika, slhayan sspug, ni slhayan ddxgal. manu saw kiya ni babaw niya wada ku ini paaemptrmisuh matas, kiya ni musa ku smluhay mgriq asu skaya, maaempgriq asu skaya.
mataru hngkawas brah na, mnda ku tgqmul tadus bnaqig Sahara hiya. naqih ka asu skaya ni asi ku iying nanak smlaan. keeman mtaqi ku tadus bnaqig, saw sklwiun mgrbu saw saman, niqan seejiq ka miyah ptutuy knan. niqan ka laqi rmngaw knan:jyagi ku rmisuh matas kingal mirit.
aji ku rmnisuh matas ka mirit, asi ku nanak risuh matas tgkingal rnisuh mu matas, kiya ni rmngaw ka hiya: ini tduwa, aji ku ka quyu qbibing niqan kingal kacing wiwil muhing nbuyas na, mirit ka mkmngalun mu. wada ku mnpiya rmisuh matas o ida na aji kuxul. mtbiyax ku bi smmalu asu skaya, kiya do hmut ku rmisuh matas kulu mgay hyaan, rngagan mu ga ska hiya ka mirit sun mu, ana yaa saw kiya tayal qaras na. laqi nii o saw pnseanak balay, kiya do pthnganan mu laqi thowlang bilaq sun mu.
babaw niya hana ku mkla, laqi thowlang nii o pnaah thiyaq balay pngrah, pngrah ki o mgkala cicih hiyi na kmpraan. kiya ni spgkla mu rudan siida, ungat ana kingal ka smnhiyi kari mu. manu saw kiya ni babaw niya srngaw mu kana sjiqun, laqi thowlang nii o pnaah bilaq balay pngrah B612, bilaq pngrah nii o hnjyalan 1909(maxal mngari kbkuy mngari )hngkawas. rdrudan o wana nanak paah sspug ka kkla dha pusu babaw dxgal.
laqi thowlang o qlhangun na balay ka kngkingal klgan mneudus ini klglug babaw pngrah hiya. niqan pxal, rahuq na hiya ka pngrah baraw, niqan kingal seejiq empdawi smnguhi kmaraw buut mntucing qhuni paru, wada maaparu balay saw smtali: dnayaw mu hyaan rmisuh matas ka mirit o mtduwa mkan buut qhuni, nii o wada pqaras balay lnglungan na. kiya ka kiya ni slbhnun na balay ka eekan mirit quri phpah Meykuy. smiling knan ka hiya, pakaw phpah Meykuy o mtduwa kmlawa hyaan nanak aji eekan mirit hug? mtbiyax ku smmalu asu skaya ni smiyuk hyaan:ungat lama brihan ka pakaw phpah Meykuy, gisu ku mtbiyax, iya ku ngali saw nii ungat brihan euda miyah prrawa.
naqih kuxul na ni rmngwa: nasi niqan seejiq kska kmbkiyan pngrah o smkuxul burux bi phpah Meykuy, kiya ni wana nak qmita ppngrah do tayal balay qnsbliqan kida. kiya ka kiya ni nasi wada uqun mirit ka phpah do quri hiya ga mdka saw wada asi kphing kana ka ppngrah, saw nii o aji paru euda msa su. naqih kuxul mu smran mu ni sbyaxun mu ka laqi thowlang, srisuh mu hyaan matas rawa quwaq ka mirit na.
pusu nniqan laqi thowlang o ga niqan phpah Meykuy. sksikan na ka pusu nniqan na, gmabal hru qhuni paru ni kmaraw dgiyaq mspruq. bilaq bi ka dgiyaq mspruq na, mtduwa puyan balung. dhuq keeman do seubung na lihaw kmlawa ka phpah Meykuy.
mlatat pusu nniqan na siida, plaqan na qsiya ka phpah meykuy, gmukan na lihaw ni hcian na rmngaw: swayay ta han. smiyuk hyaan ka phpah: swayay ta han. psaan na isil ka gumuk lihaw, aji ku mduuy hyaan da. nasi ku mkmkla klaway o asi ku ka knrmun bi mkaraw hiyi mu ka pngayus. ini ku kiisug samat uri, niqan kukuh mu. ptbyaxun na smkagul powsa ka laqi thowlang, kiya ni balay bi aji na ppqita hbuy rusuq dowriq na.
snhiyun mu laqi thowlang o stguhuy tthjil dqbhni mtneuda ni mlatat. mtneuda lala balay pngrah nniqan ka endaan na, smtrung lala balay seejiq saw smhulis uri.
tgkingal pngrah nniqan o ga niqan kingal thowlang paru. babaw na dhuq hika laqi thowlang do powsa kari hyaan ka thowlang paru eeniq na hiya. ini thiyi hyaan ka laqi thowlang, ppsramal na latat hiya, kiya ni powsa kari hyaan ka thowlang paru llatat na hiya.
tgdha pngrah nniqan o ga niqan seejiq smkuxul bi qtaan lipax. gmspung laqi thowlang duuy na iril baga ttlung na narat baga. muda ka laqi thowlang do rmngaw ka hiya: mhuway su balay tnapaq su baga, balay bi thmuku su knan.
tgtru pngrah nniqan o ga niqan kingal emptsinaw, gmrung jiyax mimah sinaw. seimah na sinaw o yaasa mkmsnguhi. mkmsnguhi saw sqaun endaan na, yaasa saw smsiqa ka gmrung jiyax mimah sinaw.
tgspat pngrah nniqan o ga niqan kingal seejiq empsmbarig. gmrung jiyax smpug ni rmisuh matas snbrigan. ini pstuq pspug pngrah karat baraw ni nnaku ka kana pngrah msa.
tgrima pngrah nniqan o ga niqan kingal seejiq empsamaw. kngkingal kngkmanan smamaw samaw elug ni mgrbu do phngun na duri. yaasa bilaq balay ka pngrah nniqan ni mslikaw balay mspgriq uri, kiya ni hiya ga kingal jiyax o kingal spngan tuki kmbragan na. seejiq empsamaw o mkrbuk balay smamaw ni mhing samaw.
tgmataru pngrah nniqan o ga niqan empthnigan dxgal. ga na srisuh patas na hika lala balay hangan nniqan, kiya o hangan dgiyaq ni yayung. empthnigan dxgal o ini risuh matas llbu snryuan euda, wana ini kmpriyux saw dgiyaq ni gsilung paru ka srisuh matas msa ka hiya. embahang rnngaw na ka laqi thowlang do llbu balay snryuan ka phpah do slhbun balay ka hiya.
tgempitu pngrah nniqan dhqan laqi thowlang o babaw dxgal. kiya o paru balay nniqan, babaw dxgal gaga o niqan kbkuy maxal kingal hiyi thowlang paru, empitu kmxalan kbkuy hiyi emptdxgal, mngari kmxalan kbuhug hiyi empsmbarig, empitu kbkuy kbuhug hiyi emptsinaw, tru hpucing hiyi smkuxul lipax skbrhuan, spuun do yaa bi empusal hpucing hiyi seejiq. brah wada smmalu samaw ka seejiq, babaw dxgal asi ka mspatul mataru kbuhug hiyi seejiq ka smamaw o kika tduwa smamaw keeman.
hana dhuq babaw dxgal siida ka laqi thowlang, smtrung kingal quyu saw xiluy liqa lhang na tadus bnaqig. rmngaw hyaan ka quyu: nasi niqan kingal jiyax lmnglung su balay pngrah nniqan su o tduwa ku dmayaw sunan.
mrakaw kana tadus bnaqig ka hiya ni hana dhuq ga niqan seejiq. qmita kingal hmaan phpah ka laqi thowlang, mnqhnga ni ini dhuq rmngaw. ga hiya o niqan mrimal kbkuy(5000)phpah Meykuy, mndka balay kndkilan dha kana. asaw mu sa kingal bi naku nak ka phpah meykuy, kla su ha hmut kana ka hiya, niqan phpah mu ni tru ka dgiyaq mnspruq mu o kana nii ga wada ini dhuq paakingal pkparu knan laqi thowlang. lmnglung ni kiya do tgtapaq babaw spriq ka hiya ni lmingis da.
nii siida sriyu ka rqbux da. nii ku naqih kuxul, iyah tuhuy knan hmrapas msa ka laqi thowlang. rmngaw ka rqbux:aji ku tduwa supu sunan hmrapas, ini ku pkngahi niya na. quwri knan, isu o kingal hmut laqi snaw, quri sunan, yaku uri o kingal hmut saw rqbux. nasi saku pkngahun, kika empddayaw ta da. quri knan, isu do empwana taxa bi ungat hi duri, quri sunan, yaku uri o empwana taxa bi ungat hi duri.
rmngaw ka laqi thowlang: mkmusa ku cih mkla lupung, kiya ni ini tuku ka jiyax mu. rmngaw ka rqbux: seejiq sayang do ungat jiyax dha usa mkla ana manu euda. saw skeusa sbrigan marig qngqaya saw ida nniqan. kiya ka kiya ni sbrigan babaw dxgal o ungat ka smbarig lupung, manu saw kiya ni seejiq o ungat lupung dha. laqi thowlang o kngkingal jiyax ida saw jiyax niya musa qmita rqbux, saw nii, wada na pkngahun ka rqbux da.
dhuq ka jiyax sswayay dha da, rqbux o smulu hyaan eusa na pxal duri phmaan phpah qmita phpah meykuy. babaw niya pxal duri musa qmita phpah meykuy ka laqi thowlang do ini pndka ka llnglung lnglungan na da. rmngaw dhyaan ka hiya: yamu o ana bilaq ini namu pndka phpah meykuy mu, ungat seejiq pnkngangah munan, ungat seejiq qmneepah munan. phpah meykuy mu yaku o ana kingal bi, kiya kana namu knshjilan na. sbliqan mu bi murus qsiya, gmukan mu gumuk lihaw, seangal pngasuy hiyi na, tgseesu ku embahang kari na, hiya o phpah meykuy mu.
mswayay ka laqi thowlang paru ni rqbux, rmngaw hyaan ka rqbux: swayay ta han, pusu balay ka qngqaya o aji qtaan dowriq, wana dmuuy lnglungan ka mtduwa qmita. yaasa wada su sdungus qmita phpah meykuy ka jiyax su, kiya do wada saw nii maamshjil ka hiya.
mkleelug ku embahang endaan laqi thowlang siida, tgmaspat jiyax sntrngan mu mqraqil, siida mnsngari bilaq bi ka qsiya mu do wada qhduun mimah uri da. mseupu nami mksa tadus bnaqig ka laqi thowlang, mowsa nami miying hghgan qsiya. ki nksa nami, prajing mkuung ka karat, sriyu ka pngrah.
mquri karat baraw qmita ka laqi thowlang, kiya ni rmngaw knan: suyang bi ka pngrah, yaasa babaw niya o niqan kingal phpah ini qtai dowriq. duri pntruma qmita tadus bnaqig lnhang idas ni rmngaw: suyang bi ka tadus bnaqig, yaasa ga tgliing mgmuhing hika hghgan qsiya. lmutut nami mksa, nhdaan balay rmdax siida hmlay nami ka hghgan qsiya da.
keeman siida o kingal hngkawas dnhqan laqi thowlang babaw dxgal. kiya ni pklug balay jiyax nii psramal na eusa, pskiyig ku qmita ga empprngaw dha quyu saw xiluy liqa lhang na. dhuq ka keeman, klaun mu wada musa saw pnrngagan dha ka laqi thowlang.
mataru hngkawas da, ini mu tai duri ka laqi thowlang. ini mu shngii ka nhdaan bi kari na knan o saw nii: keeman, qmita ku karat baraw siida, yaasa gaga ku mniq tgkingal pngrah hiya, yaasa gaga ku mhulis babaw pngrah hiya, quri isu o mdka saw gaga mhulis kana ka pngrah. pngrah su o kika pngrah mkla mhulis.
pxal duri qmita knan ka lupung mu ni dhuq ku meudus miyah duri o mqaras balay kana, kiya ka kiya ni balay bi o naqih bi ka kuxul mu. wada ku dmayaw rmisuh matas gumuk quwaq mirit laqi thowlang, kiya ka kiya ni shngian ha rmisuh ka ngul na da. ana asi huya msa do ungat na klaan ha gmumuk gumuk ka quwaq mirit na da. lmnglung ku kdjiyax, mirit gaga ga aji na uqun ka phpah muda hug? mnsuul ku lmnglung, laqi thowlang o sbubung na gumuk lihaw mnduwa kmlawa kngkingal kngkmanan ka phpah, ida na endwaun qmlahang ka mirit uri. mshaya ku lmnglung do tgseesu mquri knan mhulis ka kana pngrah da. niqan duma ka lmnglung ku duri, nasi niqan kingal jiyax wada na ini qlhangi, smnguhi gmumuk gumuk lihaw do ma pasi saw smtali kida. lmnglung ku hini do pngrah karat baraw do wada maarowsuq dowriq kana da.
quri kana yamu nii mndka smkuxul laqi thowlang o ga thiyaq balay pngrah nniqan ga, niqan kingal mirit ini ta klai, aji na yaa wada uqun ni ini na uqi ka phpah meykuy o kiya ni kana ana manu knlangan do asaw kiya empaaaji pndka da. pquri karat baraw kana qmita, lnglung, wada uqun mirit ka phpah hug? aji uri o ini uqi, nii siida klaun namu, empaaaji pndka kana da.

英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容/英文版課文內容