sa mtzyu’ kawas maku na ga, cingay balay innglung maku sa lhlahuy ru lmqu’. pyang balay te ringan na pinnatas innrwan mu ga, yan sqani ktan. 我把畫拿給大人看，問他們會不會感到害怕。結果每個人都反問我，帽子有什麼好怕的呢？於是我只好把它的內部畫出來：
laxi si patas yan qani ungat nanu zyaw na pinnatas son saku nha, inblaq mqbaq ego ru gaga lpgan ru gaga rhyal nyux ta ki'an qani son saku nha, nanu ini saku p'patas na squliq ru musa saku mqbaq qmuzit hikoki, yasa qu m'pquzit hikoki saku la.
tzyu’ kawas wayal ga, mhutaw saku mlaka ku hikoki sa rhyal ini bhki'i na k'man Sahala. mhiriq kikay na hikoki maku, ru klazyun maku nanak. m'abi saku sa rhyal ini bhki'i na k'man, si ktay maki qutux squliq mwah tmuliq kun sasan , qutux ‘laqi cikuy nyux mwah kmal mha”an saku spatas qutux mit.”
iyat saku minmatas ana qutux mit lru, nanu si maku an patas yan te qutux minnatas maku qasa, si ktay kmal mha "iyat, iyat saku cyux ki’an zow ktu na mqu hya, mit szyon maku." spatas maku minpira ru ini nya szyay kwara. tqoh saku kbalay nyux mhiriq hikoki mu ru si maku hmtan matas qutux kulu brbal, kyalun mu mha"cyux qsahuy nya qu mit" ima baq mha qani qu szyon nya balay.
tmnanak cikay qu laqi qa ru , si maku slluy "Syaw-wangc"la.
babaw nya lga baqun maku sa minkahul twahiq balay na bingah qu Syaw-wangc qani, ini henas kinkrahu hi nya qu bingah cyux nya ki’an qasa. ana ga ungat qutux squliq snhi son maku sqani kmal, nanu babaw nya lga, si maku say mha Syaw-wangc hya ga minkahul sa bingah te “pi612” cikuy na bingah , bingah qasa ga, minlwan nha sa te qutux seng qeru kbhul ru qeru kawas. kwara squliq hya ga, tkahul lmpgan qu kinnbaq nha cinbwanan qani.
pinbaqan nya balay kwara kk’man ru qqhuniq bingah nya qu Syaw-wangc . mnxal ga, mungi kmagaw bway qhuniq qu qutux mqelang na squliq bingah te binah lru maymaw htgan krahu na zyaw la. mit pinnatas maku qasa pqasun na Syaw-wangc balay, baha mswa baqun nya maniq bway ghap na qhuniq krahu. ana ga inkoxun nya balay pqaniq na mit qu phpah mekwe uzi. pqutan saku nya mha baqun hmtuy na bqzi mekwe qu mit ? baha mswa nyux saku tquh kbalay hikuki mu ru si maku qri kmal mha”ungat nanu zyaw na bqzi mekwe hya,aw laxi saku smzyogiy na zyaw yan qani hya”.
yaqih qsliq nya kmal mha“mha maki qutux squliq, tkahul nya pira ‘el seng mang kinpzyux bingah muluw qutux phpah mekwe qu qsliq nya balay ga, nanu ana mita kinmita bbingah kayal lga, mosa m’yan nanu zmimu inlungan nya . mha wahan maniq na mit qu phpah mekwe qasa , knita na lungan nya hya lga, aki yan na wal si t’os m’uzyut kwara syax bingh kayal la. iyat su son mha zyaw na krahu na pi?” si qmtux lungan mu uzi lru gbon mu zmimu qu Syaw-wangc , spatas maku qutux qnwayan nqwaq qu mit qasa.
cyux ki’an qutux phpah mekwe bingah ki’an na Syaw-wangc . inblequn nya kmagaw krryax ,hbyatun nya ghap qhuniq krahu ru spuhan nya krryax rgyax htgan puniq qasa uzi. cipo balay rgyax htgan puniq qasa, tnaq ksosan qutux bazing nanak kincikuy. mlhngan lga, ‘mukan nya na kopu na kita qu phpah mekwe.
yasa ryax pshriq bingah nya ga, inblequn nya pqsya’ ru ‘mukan nya na kopu na kita qu phpah mekwe, kyalun nya mha“inblaq mlahang nanak hi su,sgaya ta la” kmal qu phpah mha“sgaya ta la. agal si sa syaw umuk qani, iyat saku pumuk , mha saku aki mpqbaq ki qqperay ga, nanu si ki thuyay saku smru mkaraw hi mu qu kkumay. ini saku kngungu qnhyun uzi, ta nyux saku ki'an kamil” tqohun nya posa Syaw-wangc , ga teta nya ini ktay msbuq roziq nya maqu lungan nya balay hya.
thyun mu sa ki’a minluw kahul twahiq na qqbhniq nyux thuyay tehok sqani qu Syaw-wangc . pira ‘el bbingah cikuy wal nya hnasun ru pira ‘el mnanak na squliq wal nya stnaq.
qutux thoki cyux maki sa te qutux bingah hya,trang tehuk qu Syaw-wangc ga, qhlun nya pkaki bingah nya qu Syaw-wangc , ga ini nya pongiy ke aki musa qu Syaw-wangc lru si hakas tmu mha nhai usa la son nya.
te sazing bingah ga qutux smoya trahu na squliq cyux maki sqasa hya. agal qba su llaw hruy cikay qba su ‘zil son nya qu Syaw-wangc , ru mha qasa Syaw-wangc lru, kmal mha “mhway balay tnapaq su qba knan, strahu sak balay wah.”
te cyugal bingah hya ga, qutux tbusuk cyux maki sqasa hya , nanu si ryax mnbuw qwaw, teta baqun mungi kinksazyux nya mru, aw si ryax tqqwaw qu nyux nya sksazyux squliq.
bingah te pazyat hya lga, qutux ptbazi cyux maki kya hya . yasa si plpuw ru miru pira pila nya krryax. plpgun nya krryx pira bingah cyux maki babaw kayal, ru rwan nya kwara qu bingah qasa hya lma.
maki sa te magal bingah ga, qutux ppilaw na squliq cyux maki kya hya. qutux qutux lhngan ga plagan nya pilaw tuqiy ru ‘zyutan nya lozi sasan, baha mswa cipoq qu bingah nyux nya ki'an ru helaw balay miray qu bingah lru qutux ryax ga qutux puzi spung nanak kinr’tung. nanu si ryax milaw muzyut milaw muzyut qu ppilaw qasa.
te tzyu’ bingah ga, qutux minbaq sinsi na rhzyal cyux maki sqasa hya. cingay lalu na rhyal cyux nya sbiru sa biru nya, yan na lalu na rrgyax ru lllyung. “ini bruy na minbaq sinsi na rhzyal qu si t'os mhtuw ru zinga wal mpyu’ na zyaw hya, nanak zyan rrgyax ru lllyung qu si kaki krryax qu brwan nya hya ” r’suw lungan pongan na Syaw-wangc qu ke nya mha phpah hya ga zinga mpyu’ na zyaw qasa hya.
te pitu bingah nwahan ni Syaw-wangc hya ga rhyal nyux ta ki’an qani. krahu balay qu bingah qasa hya, qutux kbhul mopuw qutux thoki cuyx maki sqasa, pitu’ seng minbaq sinsi na rhzyal ru qeru pgan mang squliq ptbazi ru pitu’ kbhul mang tbusuk ru cyugal 'ok smoya trahu na squliq cyux maki sqasa, ki’a mpusal 'ok squliq kwara qu nyux maki rhyal ki'an ta qani hya. ungat qu rengki na ga, mlhngan ga, siki mpatul tzyu mang ppilaw na squliq ga , yasa tnaq milaw nyux ta ki'an na rhyal qani hya.
nisan tehok nyux ta ki'an rhyal qu Syaw-wangc ga, stnaq nya qutux mqu' smyax. kyalun nya Syaw-wangc mha"mha su s'nun bingah su ga, kal r'agay misu "
bsyiq pinkngyan nya squ rgyax ini hbki'i na k'man lru, yasa tehok qalang nyux ki'an na squliq la. ktan ni Syaw-wangc qutux tanux pmyan phpah ru memaw si ngaqa' ungat kkyalan hya. magal seng phpah mekwe cuyx pmyan sqasa,ru si ktnaq ktan kwara. mnglung Syaw-wangc mha"si maku hya ga qutux nanak phpah mekwe mu qu phpah hya , ima baq ini yan sqasa, qutux qu mekwe maku ru cyugal rgyax htgan puniq rwan maku, ga ini saku thuyay m'laqi na mrhuw krahu na " lungun lungun nya lru, si hakas tapaq m'abi mngilis sa kk'man qu Syaw-wangc la.
son kasa mhtuw qu qbux la. kyalun Syaw-wangc mha"wahiy saku smbes mzyuy ma, nyux yaqih qsliq mu" kmal qbux mha "iyat saku qbaq mhyapas ki sunan, baha mswa iyat saku qnyatna na squliq na. knita misu ga, qutux cipoq na laqi mlikuy su, knita saku uzi ga, qutux saku qbux nanak uzi. mha saku qzyatan ga, aki ta mblaq mbsbes. knita mu isu lga, mosa ungat ima thuzyay kingiwan isu lru,knita su knan uzi lga,mosa ungat ima thuzyay kingiwan knan uzi la."
kmal Syaw-wangc mha"aki saku mqbbaq cingay rangi ga, ini tehuk zyaw maku." kmal qu qbux mha"ungat qu ryax mqbaq ana nanu zyaw qu squliq musuw qani hya . ru nanak mazi tbiran qu baqun nha la. ga ungat qu tbazi rangi hya, nanu ungat rangi nha squliq misuw naqi hya la. " 'san mita ni Syaw-wangc krryax qu qbux qasa lru, yasa smwal pqayat hya qu qbux la.
tehuk qu pshriq na ryax, 'say mita cikay lozi mekwe ka cyux tanux pmyan phpah qasa son na qbux. ngayan lozi ni Syaw-wangc qu mekwe nyux sa tanux pmyan phpah, ini ptnaq balay qu knita nya la. kyalun nya qu phpah mha"ini simu kyan mekwe maku ana qutux, ungat ima minqnazyat simu mintzyaw na simu. ana qutux nanak qu phpah maku mekwe , ga maki sa lungan mu ga hnasun nya kinkrahu mamu kwara . inblequn mu pqsya ru 'mukan mu kopu kita, galun mu kwara kumay nya, inblequn mu mung nanu nyux nya skal, hya ga mekwe maku. "
sgayan na Syaw-wangc qu qbux, kyalun na qbux mha"sgaya ta la, syan ta balay inlungan na zyaw hya ga mutu ini ktay na roziq , si ki inblequn ta smi sa lungan ga baqun ta mita. wal su syun sa phpah mekwe su ryax su ru, yasa qu krahu balay inlungan su shya "
mung saku pinqzyon ni Syaw-wangc zyaw kntan nya tuqi ga, yasa te spat ryax hintagan mu rhyal Sahala, cikuy balay thay qsya wal maku suqun mnbuw uzi la. mhkangi sami ki Syaw-wangc sa rhyal ini bhki'i na k'man, musa sami hmkangi qutux bling bbwan qsya. son kasa, mnkum kayal lru, mhtuw bingah la.
squli mita kayal qu Syaw-wangc ru kyalun saku nya mha"betunux balay qu bingah hya, baha mswa cyux ki'an qutux phpah mekwe ini ta ktay roziq" ru ngayan nya syax byacing nyux psyax sa rhyal ini bhki'i na k'man, kmal mha"betunux balay ktan rhyal ini bhki'i na k'man qa, baha mswa cyux lqingan qutux bling bbwan qsya sa hkuy nya. " ini sami hngaw mhkangi lru, 'lwan myan sa klpaw qu bling bbwan qsya la.
lhngan qasa ga, yasa qutux kawas kinki'an nya rhyal nyux ta ki'an qa qu Syaw-wangc . nanu ryax qani qu mmosa kni'an nya bingah .ru ktan mu cyux mpkal ki smyax na mqu' qasa. lhngan blay lga, baqun maku sa wayal 'san nya qu Syaw-wangc la.
mtzyu kawas wayal la,iyat maku kntan ana qutux qu Syaw-wangc. ini mu zngiy pucing knal nya ke mha sqani"lhngan ga,squli su mita kayal ga, baha mswa cyux saku maki sa qutux bingah kayal, ru knita su bingah babaw kayal lga, yan cyux msyiq kwara. nanu bingah nyux su ktan ga, baq msyiq kwara na bingah su isu hya la".
ta kinmqoyat saku balay ma kwara rangi mu i ktan saku nha nyux saku mqyanux mbinah mwah ngsal lozi, ga nyux qmtux balay qu lungan mu hya. wal maku spatas umuk nqwaq mit ni Syaw-wangc , ga mungi saku matas qutux habuk.ana nya si say nanu ga ini nya thzyazi p'umuk nqwaq na mit qu qneway nqwaq qasa. mnglung saku krryax mha, nniqun na mit qu phpah qasa? kruma mlung saku,mosa inblequn mumuk kopu kita na Syaw-wangc qu phpah, mosa nya inblequn mlahang mit uzi. mha ku sqani mnglung lga, cyux si shway msiq kwara qu bbingah la. kya ruma lungun mu lozi, qenu zngyan nya mumuk na kopu kita lga, talagay kinyaqih qasa hya lpi. mha saku sqani mnglung lga, yan cuyx msbuq roziq kwara qu bbingah kayal la.
yan simu blaq mamu uzi qu Syaw-wangc qani hya ga, cyux qutux mit iyat ta kinbaq sa tohiq balay na bingah ga, ki'a nya wal niqun qu phpah mekwe , ki'a nya ini niqi ,ga iyat ptnaq kwara knita ta cinbwanan la. squli mita kayal kwara mamu pi, lnglung cikay mha, qenu wal niqun na mit qu phpah mekwe? ru ini nya niqi ? nanu baqun mamu sa iyat balay ptnaq kwara knita mamu lay.